Dziaŭčyna ŭ adnoj tolki bialiźnie prychiliłasia plačyma da ścienki i aplała nahami maładoha čałavieka ŭ trusach-siamiejnikach i majcy-ałkahaličcy. U toj ža pryhažuni na viečaryncy ŭ kłubie kavaler ablizvaje aholenyja hrudzi, a potym zapuskaje ruku pad spadnicu.
Fryvolnymi zdymkami siońnia składana kahości ździvić. U sacyjalnych sietkach na ich traplaješ, navat kali ničoha takoha nie šukaješ. Zdajecca, heta całkam naturalna – raspranucca, nadźmuć vusny, sfotkacca i vykłaści siabie ŭ Sieciva. Padzialicca z astatnimi pryvatnym žyćciom. Jana Kancavienka taksama padzialiłasia. A paśla pieramahła na konkursie «Mis Minsk – 2013».
Ciapier na ŭsiu moc abmiarkoŭvajecca, ci moža takaja dziaŭčyna nasić karonu najpryhažejšaj ź miančanak. Čamu nie? U takich konkursach vyznačajuć nie prosta pryhažuniu z pryhažuń, a jašče i tuju, chto najlepš adpaviadaje svajmu času.Kali padychodzić da konkursu z takim staŭleńniem, da Jany ŭvohule nie pavinna być pytańniaŭ. Jaje kankurentkami akazalisia stryptyziorki i dziaŭčaty go-go, čyje partfolijo ŭtrymoŭvajuć nie mienš pikantnyja zdymki i videa. Toje, što pryhažość Mienska ŭvasablaje takaja kampanija, – ni dobra i ni drenna, a prosta fakt, jaki adlustroŭvaje i toje, jak my sami pazicyjanujem našu krainu ŭ śviecie.
My lubim vychvalacca pierad zamiežnikami, jakija ŭ nas u krainie pryhožyja dziaŭčaty, trubim ab hetym pry kožnaj nahodzie. A ź jakoj, ułasna, metaj? Rasšyfravać pasył možna i tak: treba pryhožaja krala – davajcie da nas, u Miensk! Tut vy ŭsio znojdziecie.Renamie pakrysie składajecca. Biełaruś užo zrabiłasia adnym z ulubionych miescaŭ dla sieks-turyzmu.
Na zamiežnikaŭ niekatoryja hrašać.
Panajechali, razbeścili našych Janak i Adelek, uviali ich u błud, pazbavili niavinnych aniołaŭ cnoty. Usio heta tryźnieńnie. Hości stalicy tolki karystajucca tymi pładami, što im doryć horad.Pra vytoki hipiersieksualnaści biełarusak i pra toje, čamu našu krainu (i ci tolki jaje?) zachapiŭ taki trend, možna razvažać i spračacca vielmi doŭha, adnak davajcie inšym razam. Prosta kanstatujem: za apošnija hadoŭ dziesiać Biełaruś značna prasunułasia ŭ eratyčnym kirunku. Jak Ksiuša Sitnik, što ŭ dziacinstvie śpiavała naiŭnyja piesieńki, a ciapier padrasła i raduje tych, chto nie zabyŭ jaje tvorčaść, śmiełymi fotkami ŭ staniku.
Samim biełarusam nie varta kurčyć ź siabie purytan. Navat dziŭna, što našyja prajavy sieksualnaści ŭsio jašče šakujuć nas samich i vyklikajuć niejkuju dyskusiju.Vystup rasijskaj pornazorki Kaci Sambuki sabraŭ u mienskim kłubie niachiłuju aŭdytoryju. Arhanizatary zaznačali, što ludziam spadabałasia. Na «Jeŭrabačańnie» my pasyłajem Alonu Łanskuju, jakaja vychodzić na scenu ŭ karaciusieńkaj sukiency, i bolš adkrytaha ŭboru niama ni ŭ kaho z udzielnikaŭ konkursu. U fotaspravazdačach z načnych kłubaŭ bolš za ŭsio łajkaŭ atrymoŭvajuć zdymki z hołymi dziaŭčatami. Heta ž nie araby i rasiejcy klikajuć, tak?
Nad brendam Mienska ŭžo niekalki miesiacaŭ łamajuć hałavu najlepšyja pijarščyki krainy, dy i zachodnija śpiecy nie zastajucca ŭbaku.Anhličanie voś prydumali niejkija kambinacyi biełych i błakitnych pałosak, kab adlustravać isnaść našaj stalicy. Think Minsk – cikava, z čaho b heta? My što, dla ŭsiaho śvietu vystupajem zakanadaŭcami mod u fiłasofii, litaratury i mastactvie? U nas zapraŭlajuć intelektuały?
Łahatypam horada bolš sumlenna było b zrabić strojny žanočy siłuet. Kab dobra prahladalisia ściohny i, pažadana, hrudzi.Jašče možna vykarystać siłuet dvornika (u nas ža dobra prybrana) ci buchoha minaka, ale žanočy vyhladaje pryvabniej. Fuck Minsk – heta pa-našamu.
Žury konkursu «Mis Minsk – 2013» intuityŭna zrabiła samy abjektyŭny vybar, jaki tolki mahło zrabić. Hety vybar dobra pakazvaje našy noravy i husty. Stryptyziorki, dziaŭčaty go-go, raźviasiołyja tusoŭščycy – mienavita jany dapamahajuć Miensku ŭmacavać imidž horada, dzie možna dobra adtapyrycca.I napłyŭ takich dziaŭčat na konkursie pryhažości (jany ž na samoj spravie pryhožyja i, darečy, ničoha drennaha nie robiać) vypadkovaściu nie nazavieš. Stalica atrymała karalevu, jakuju zasłuhoŭvaje. Hałoŭnaje, kab žury nie spužałasia svajho rašeńnia.
Słaŭsia, karaleva Jana!
***
Aleh Harunovič, hałoŭny redaktar Goals.by
0
0
0
0
0
0
