Tolki što patelefanavaŭ Šuškieviču:

— Stanisłaŭ Stanisłavavič, stolki hadoŭ z vami znajomyja, a vy ŭtojvali takuju cikavostku…

Były śpikier kaža, što i chatni telefon, i mabilnik u jaho z ranicy razryvajucca. Verchału narabiŭ siužet BT pra toje, što Šuškievič z žonkaju nibyta ŭbłytalisia ŭ zabaronienuju ŭ nas sektu Muna.

Aŭtary sensacyi, jakaja ciapier, treba dumać, budzie padchoplena aficyjozam, dziejničali pavodle pryncypu "ci to jon kažuch skraŭ, ci to ŭ jaho skrali".

Reč u tym, što pieršy kiraŭnik Biełarusi sapraŭdy niaredka lotaje ŭ Seuł. Jaho zaprašajuć čytać lekcyi, udzielničać u mižnarodnych kanferencyjach. Inšym razam u takich forumach biare ŭdzieł i toj samy Mun (nia błytać z hiensekam AAN Pan Hi Munam!:) Bo heny čałaviek (da relihijnaj daktryny jakoha sapraŭdy možna stavicca pa-roznamu) zajmajecca nia tolki carkoŭnaj, ale i śvieckaj dziejnaściu, u pryvatnaści pytańniami abjadnańnia Karejskaj paŭvyspy dy reformy AAN.

"Ja sapraŭdy mieŭ sustrečy z Munam na takich mierapryjemstvach. Naprykład, u 1996 hodzie my ź im hutaryli razam z Harbačovym. Darečy, u kanferencyjach brali ŭdzieł i biełaruskija deputaty, a niekali daŭno — navat naš patryjaršy ekzarch. Maju žonku zaprašajuć tudy jak byłuju pieršuju łedzi", — tłumačyć Šuškievič. I padkreślivaje: "Razam z tym, da relihijnaj dziejnaści Muna, da jahonaj carkvy my nijakaha dačynieńnia nia majem".

Niaciažka zdahadacca, što chvala čornaha pijaru ("ukidy", kali vy ŭvažliva sačyli, adznačalisia ŭžo i na forumach "NN") spravakavanaja inicyjatyvaj Vałensy — vyłučyć pieršaha kiraŭnika Biełarusi na Nobeleŭskuju premiju miru. Možna sabie ŭjavić zuboŭny skryhat peŭnych asobaŭ pry dumcy, što raptam były śpikier, jakoha stolki hadoŭ palivajuć brudam i trymajuć na ździeklivaj pensyi paŭtara dalary, atrymaje nobeleŭski miljon i kamu-kolviek padatre nos.

"Narvehi nienavidziać sektantaŭ, tamu i treba vadu zamucić", — tłumačyć Šuškievič podbiŭku ekzatyčnaha antypijaru.

Chvali paklopaŭ jon musić tryvać nie ŭpieršyniu. Była i słavutaja "skrynia ćvikoŭ", była i "halandzkaja vutka". Maładziejšyja, darečy, pra "vutku", mo', i nia viedajuć. Padčas prezydenckich vybaraŭ 1994 hodu šerah dziaržaŭnych vydańniaŭ źmiaścili paskvil na kandydata Šuškieviča, nibyta pieradrukavany ź niejkaha halandzkaha vydańnia. Ja tady zładziŭ svajo žurnalisckaje raśśledavańnie i nadrukavaŭ u "Narodnaj haziecie" artykuł. Fiška była ŭ tym, što halandcy na zapyt paviedamili: takoha vydańnia ŭ ichniaj krainie nie isnuje.

I voś ciapier, jak tolki zapachła Nobelem, znoŭ — laciać "vutki". Pryčym kali ŭ 94-m u častki elektaratu chacieli vyklikać antypatyju da Šuškieviča pošukam katalickich ("polskich") karanioŭ, dyk zaraz voś zrabili munitam. I, musić, heta nie apošniaja fantazija. Nadta ž mulaje kamuści toj, chaj sabie i viłami pa vadzie pisany, Nobel.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?