Rasijski biudžet z kožnaj tony pastaŭlenaj u Biełaruś nafty hublaje prykładna 400 dołaraŭ. Pra heta ŭ intervju haziecie «Kommiersant'» zajaviŭ ministr enierhietyki Rasii Alaksandr Novak.

«Naprykład, letaś rasijskija naftaviki pastavili ŭ Biełaruś 21,2 młn. ton nafty. Kali my pavialičym hety abjom da 23 młn. ton, to pry biaspošlinnaj pastaŭcy heta pryviadzie da dadatkovych strat dla rasijskaha biudžetu — z kožnaj tony prykładna 400 dołaraŭ», — adznačyŭ ministr. Ale, pavodle jaho słoŭ, hetyja straty možna kampiensavać, raźvivajučy supracoŭnictva ź biełaruskimi kampanijami i stvarajučy, naprykład, SP u śfiery elektramašynabudavańnia, jakija zadziejničany ŭ vytvorčaści minieralnych uhnajeńniaŭ. «Ciapier hetym zajmajecca Minpramhandlu», — paviedamiŭ jon.

Pry hetym ministr adznačyŭ, što pakul nie vyznačanyja asnoŭnyja paramietry paliŭnaha bałansu pamiž Rasijaj i Biełaruśsiu sioleta.
«My pracujem sioleta ŭ asablivym režymie, kožnyja try miesiacy zaćviardžajem bałans. Pakul uzhadnili tolki na pieršy, druhi i treci kvartały. Biezumoŭna, biełaruski bok choča da kanca hoda padpisać bałans, my b taksama chacieli heta zrabić, ale pieraškadžaje šerah pytańniaŭ, źviazanych z ekanomikaj», — rastłumačyŭ Novak.

Jon taksama adznačyŭ, što biełaruski bok pakul nie vykonvaje pakazčyki pa zvarotnych pastaŭkach naftapraduktaŭ, jakija byli zapłanavanyja ŭ pratakole pasiadžeńniaŭ namieśnika staršyni ŭrada Arkadzia Dvarkoviča i pieršaha vice-premjera Biełarusi Uładzimira Siamaški. «Tym nie mienš, tyja abjomy, jakija byli pastaŭlenyja ŭ Rasiju za pieršyja čatyry miesiacy hetaha hoda, — 560 tys. ton naftapraduktaŭ, — adpaviadajuć popytu na našym rynku. Ale, uličvajučy vyniki madernizacyi rasijskich NPZ, mahčyma, nam da kanca hoda i nie spatrebiacca tyja ž abjomy naftapraduktaŭ, jakija byli patrebnyja spačatku», — ličyć ministr.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?