Upraŭleńniem pa rasśledavańni złačynstvaŭ suprać infarmacyjnaj biaśpieki i intelektualnaj ułasnaści Śledčaha kamiteta Biełarusi raspačata sprava ŭ dačynieńni da hrupy hramadzian Małdovy na padstavie č. 4 art. 212 KK (kradziež šlacham vykarystańnia kampjutarnaj techniki, učynieny ŭ asabliva bujnym pamiery).

Jak paviedamiła BiełaPAN aficyjny pradstaŭnik SK Julija Hančarova, padčas śledstva ŭstanoŭlena, što, majučy namier zavałodać čužoj majomaściu, dziejničajučy hrupaj asob, zamiežnyja hramadzianie nabyli śpiecyjalnyja pryłady, pryznačanyja dla niesankcyjanavanaha dostupu i kapiravańnia kampjutarnaj infarmacyi z mahnitnych pałos płaciežnych kartak, jakija im nie naležać, i PIN-kodaŭ da ich. Pryłady, jakija składajucca sa schavanaha kart-pryjomnika bankamata i pin-pada, padazronyja ŭstanavili na bankamaty AAT «BPS-Aščadbank», što vulicach Śviardłova i Kalvaryjskaj u Minsku.

U vyniku ŭčynieńnia takich dziejańniaŭ z 27 maja pa 3 červienia hetaha hoda złamyśniki atrymali rekvizity bankaŭskich płaciežnych kartak, emitavanych AAT «AAB «Biełarusbank», AAT «BPS-Aščadbank», AAT «Biełahraprambank» i vyrabili padroblenyja bankaŭskija płaciežnyja kartki.

Z vykarystańniem padroblenych anałahaŭ kart padazronyja pad vyhladam zakonnych trymalnikaŭ bankaŭskich płaciežnych kartak, vykrali hrašovyja srodki žycharoŭ Minska i Homiela na sumu bolš jak 475 młn. rubloŭ. Padčas rasśledavańnia taksama ŭstanoŭlena zamiešanaść padazronych u kradziažach z rachunkaŭ žycharoŭ Oršy ŭ lutym-sakaviku hetaha hoda na ahulnuju sumu bolš jak 230 młn. rubloŭ. Usiaho ad dziejańniaŭ złačyncaŭ paciarpieli prykładna 3.000 biełaruskich hramadzian.

Adnamu z udzielnikaŭ złačynnaj hrupy na padstavie sabranych dokazaŭ užo pradjaŭlena abvinavačańnie va ŭčynieńni złačynstva, praduhledžanaha č. 4 art. 212 KK. Jon źmieščany pad vartu. Astatnija padazronyja abvieščany ŭ vyšuk.

U suviazi ź nienaležnym uzroŭniem biaśpieki, arhanizavanym u AAT «BPS-Aščadbank» pry praviadzieńni apieracyj pry dapamozie bankamataŭ, u tym liku adsutnaściu antyskiminhavych pryład na bankamatach, Śledčym kamitetam nakiravana pastanova na adras AAT «BPS-Aščadbank» i prapanavana pryniać miery pa vypraŭleńni situacyi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?