Nu voś i dačakalisia ŭ Miensku pačatku rasiejskaha elektralnaha maratonu. Ciapier paŭhodu Kramlu budzie pa vialikim rachunku nie da Biełarusi.
Kaniešnie, "Hazprom" pradoŭžyć hnuć svaju liniju, i biez čarhovaj maleńkaj vajny za haz, badaj, nie abydziecca. Zaraz u biełarusaŭ dźvie haračyja pary — letniaja bitva za chleb i zimovaja — za adnosna tanny haz. Našy ŭžo namiaknuli, i prazrysta, što pa-svojmu razumiejuć zakładzienuju u damovu na čatyry hady formułu cany na "błakitnaje paliva".
Maskva rana pacirała ruki, dumajučy, što nakinuła žaleznuju schiemu vyvadu cany na eŭrapiejski ŭzrovień! U nas svaje matematyki. I jość šancy pahandlavacca, bo z tych samych elektaralnych mierkavańniaŭ drać try skury z bratoŭ-biełarusaŭ hetym razam nie ryzyknuć.
Tym bolej nia pojdzie zaraz Kreml na rezkija palityčnyja ruchi ŭ dvuchbakovych dačynieńniach. Choć u ich tam i kiravanaja demakratyja, a ŭsio adno treba skancentravacca, adklučyć lišnija razdražnialniki, kab i pierazahruzka Dumy, i aperacyja "Pierajemnik" prajšli biez sučka dy zadzirynki. Tak što prahnozy niejkich blickryhaŭ na biełaruskim kirunku, što ad pačatku vyhladali na pijar, kančatkova pavisajuć u pavietry. I ŭviesnu pieršy biełaruski prezydent maje ŭsie šancy pavinšavać treciaha rasiejskaha. Ź ciapierašnim, jak my niadaŭna pačuli, abmiarkoŭvać niama čaho:)
Dla Alaksandra Łukašenki, badaj, niama vialikaj roźnicy, chto stanie nastupnikam — Ivanoŭ, Miadźviedzieŭ, niechta treci… U lubym vypadku heta budzie drabniejšaja fihura, čym Pucin. I nia budzie apryjory cisnuć na psychiku doŭhaja historyja asabistaj niepryjaznaści. Tak što ŭ niejkim sensie — navat plus. A zrazańnie datacyj zaprahramavana tak ci inačaj, tamu cisk — pry dapamozie najpierš enierhietyčnych vaharoŭ — budzie planamierna narastać pry lubym novym haspadary Kramla.
Anšlus jany ŭžo prapuścili. Buduć sprabavać cichaj ekanamičnaj sapaj.
