Karparacyja «Majkrasoft» abnarodavała vyniki svajoj finansavaj dziejnaści ŭ Biełarusi. Akazałasia, što pa chutkaści rostu jaje biznes u Biełarusi moža supierničać chiba što ź biełaruskaj ekanomikaj.

Kali vieryć aficyjnym źviestkam kampanii, to za adzin finansavy hod (jon skončyŭsia 30 červienia) biełaruskija «plantacyi» softvernaha hihanta stali amal utraja bolš uradlivymi, čymści ŭ minułym. Pavialičyłasia j kolkaść OEM‑partneraŭ «Majkrasoft» u Biełarusi. Ciapier zamiest ścipłaha dziasiatka pradaŭcoŭ prahramnych rašeńniaŭ karparacyi ŭ krainie pad ściahami amerykanskaj kampanii pracuje 81 firma. Rabotniki adnaho z samych bahatych amerykancaŭ adznačajuć, što biełaruskija kampanii aktyŭna ŭdzielničajuć u partnerskaj prahramie Microsoft Partner Program: pa vynikach 2007 finansavaha hodu ŭ Biełarusi pracujuć try załatyja, try sertyfikavanyja i 34 zarehistravanyja partnery «Majkrasoft».

Varta adznačyć, što nia tak daŭna ŭ «Majkrasoft» davoli skieptyčna adnosilisia da tempaŭ raźvićcia biełaruskaha biznesu. Z pryčyny ekanamičnaj niemetazhodnaści byŭ navat admienieny reliz biełaruskaj versii Windows Vista i Windows XP. Pikantnaść sytuacyi palahaje ŭ tym, što adnačasova z vypuskam bravurnaha pres‑relizu adnosna pośpiechaŭ na biełaruskim froncie «Majkrasoft» uručyła premjer‑ministru Tatarstanu Rustamu Minichanavu kopiju Windows Vista na tatarskaj movie. Vidać pa ŭsim, tatarski rynak pakazvaje «Majkrasoft» jašče bolšyja cudy, čym biełaruski. U advarotnym vypadku karparacyja naŭrad ci abmiežavałasia b dziažurnym udziełam u dźviuch (!) profilnych kanferencyjach, jakija prajšli sioleta ŭ Miensku. Dla Rasiei j Ukrainy kampanija «Majkrasoft» nie škadavała žyvata svajho i adznačyłasia amal u troch dziasiatkach surjoznych profilnych mierapryjemstvaŭ, sotniach partnerskich prahram i pradała tolki ŭ Rasiei bolš za 2 miljony kopij licenzijnych prahram. Biełarusi da takich pakaźnikaŭ jašče, jak kažuć, raści i raści.

Pavodle «Ježiednievnika»

Клас
0
Панылы сорам
0
Ха-ха
0
Ого
0
Сумна
0
Абуральна
0