Dziesiacihodździe «Maładoha frontu» pačałosia milicejskaj zasadaj, a skončyłasia pajadańniem tortu.

Roŭna dziesiać hadoŭ tamu, 6 vieraśnia 1997 hodu ŭ Pałacy kultury «Sukno» prajšoŭ ustanoŭčy schod «Maładoha frontu». Hetuju arhanizacyju skłała moładź ź Miensku, Mahilova i Horadni. 6 vieraśnia 2007 mnohija z tych ludziej sabralisia va ŭpravie Partyi BNF, kab adznačyć hetuju datu.

Cikavaje supadzieńnie: u hety samy dzień 5-hodździe śviatkuje inšaja moładzievaja arhanizacyja krainy — stvorany ŭładami BRSM. Niechta z prysutnych na sustrečy pažartavaŭ, što naŭrad ci niechta ź milicyjantaŭ viedaŭ pra hetu datu. Zatoje da dnia narodzinaŭ «MF» milicyja rychtavałasia z samaj ranicy. «Cichary» pieratrasali sumki moładzi, što vychodziła ź siadziby, niekalki čałaviek navat advieźli ŭ pastarunak, ale tam paadpuskali, spasłaŭšysia na «dobry nastroj».

Śviatkavańnie nasiła chutčej siamiejny, čym aficyjny charaktar. Hości pasieli vakoł stała, na jakim stajali tarty, sadavina, napoi i častavalisia ciaham usiaje viečaryny.

Niaźmienny na praciahu mnohich hadoŭ staršynia «Maładoha frontu» Pavał Sieviaryniec prapanavaŭ prysutnym u samym pačatku vykanać himn «Mahutny Boža», paśla čaho ŭspomniŭ Źmitra Daškieviča, Artura Fińkieviča, Jarasłava Hryščeniu — «maładafrontaŭcaŭ», jakija adbyvajuć pakarańni ŭ turmie i na «chimii», ci «chodziać» pad kryminalnaj spravaj, i tamu nia mohuć prysutničać. Jak hierojaŭ zala sustrakała niadaŭna asudžanych Ivana Šyłu i Nastu Azarku. Toj samy Ivan Šyła paprasiŭ taksama zhadać pra Ludmiłu Atakułavu, «maładafrontaŭku», što adbyvaje pakarańnie ŭ salihorskaj turmie za akcyju salidarnaści ź Ivanam.

U pieršaj častcy imprezy słova dali palitykam, jakija vyjšli z «Maładoha frontu». Naprykład, namieśniki staršyni Partyi BNF Aleś Michalevič i Alaksiej Janukievič. Michalevič adznačyŭ, što kožny siońniašni «maładafrontaviec» varty dziesiatku raniejšych, bo tady jašče nie sudzili za ŭdzieł u niezarehistravanych arhanizacyjach, hetak nie pryciskali moładź. «Ja zachaplajusia mužnaściu siońniašnich junakoŭ, jakija pieraniali ad nas estafetu ŭ «Maładym Froncie», — adznačyŭ Michalevič. Alaksiej Janukievič začytaŭ vierš Ryhora Baradulina «Maładomu frontu», jaki narodny paet Biełarusi napisaŭ u traŭni 1997 h.

Było začytanaje vinšavańnie ad pasła ZŠA ŭ Biełarusi Karen Stjuart. Jaje pradstaŭlaŭ na imprezie pieršy namieśnik Džonatan Mur.

Sieviaryniec uzhadaŭ asnoŭnyja etapy dziejnaści arhanizacyi — ad stvareńnie moładzievaha kryła BNF u 1992 h. da kryminalnych spravaŭ Ivana Šyły i Nasty Azarki, prysudy jakim byli ahučanyja za dva dni da hetaha.

Paśla byŭ začytany śpis hałoŭnych dasiahnieńniaŭ arhanizacyi za hetyja 10 hadoŭ. Pryvodzim jaho ŭ paradku ŭbyvańnia: 10) Alternatyŭnaja Alimpijada «Maładoha frontu» (1998 hod); 9) Akcyja «Biełaruś — u Eŭropu!»; 8) Varta ŭ Kurapatach; 7) Adukacyjnaja akcyja «Šoŭ Biełaruščyny»; 6) Akcyi na Dzień Śviatoha Valancina; 5) Satelitnyja arhanizacyi «MF» — «Kraj», «Zubr» i inš.; 4) Akcyja «Horad naš»; 3) Akcyi salidarnaści sa Źmitrom Daškieviča, Paŭłam Krasoŭskim, Źmitrom Chviedarukom, Barysam Hareckim, Aleham Korbanam, Nastaj Pałažankaj, Ivanam Šyłam i inš.; 2) Pakaleńnie «Maładoha frontu»; 1) Sam «Małady front».

Na pryzy ad Vitala Supranoviča była razyhranaja viktaryna «Šoŭ Biełaruščyny» pa historyi «MF». Sieviaryniec pytaŭsia, kolki papiarovych aniołaŭ było vyviešana na siadzibie Partyi BNF u 2000 h., kali śviatkavałasia 2000-yja ŭhodki ad naradžeńnia Chrysta, albo kolki hadzin doŭžyŭsia futbolny matč bieraściejskich «maładafrontaŭcaŭ», jaki paźniej uvajšoŭ u Knihu rekordaŭ Hinesu. Najbolš daśviedčanym u historyi «MF» akazaŭsia jaho kolišni sustaršynia Siaržuk Bachun ź Bieraścia, jon vyjhraŭ try dyski.

Pry kancy imprezy Sieviaryniec začytaŭ kreda «Maładoha frontu». «My baimsia Boha i bolš nikoha, tamu «Małady front» vystajaŭ usie hetyja hady, kali razvalvalisia inšyja arhanizacyi, kali pieraśledavali našych aktyvistaŭ. My vierym u Boha — heta hałoŭnaja naša zasłuha».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?