Hruby ŭčynak amierykanskaj hrupy Bloodhound Gang vyklikaŭ hnieŭ Rasii, piša amierykanski sajt The Christian Science Monitor. Jak paviedamlałasia, na kancercie ŭ Adesie basist hrupy zasunuŭ rasijski ściah sabie ŭ trusy. Paśla hetaha hrupu nie puścili na zapłanavany kancert u Rasiju, u Anapu, pryčym na artystaŭ tam napali miascovyja kazaki. Basista pry hetym ledź nie zadušyli amierykanskim zorkava-pałasatym štandaram.

Jak ličyć vydańnie, incydent z rasijskim ściaham dazvalaje vykazać zdahadku, što ŭ časy, kali adnosiny Maskvy i Vašynhtona rezka pahoršylisia, hramadskaje ŭsprymańnie z abodvuch bakoŭ stała abvostranym.

Upraŭleńnie MUS pa Krasnadarskim krai zaviało kryminalnuju spravu pa fakcie «niepavažlivaha staŭleńnia da dziaržaŭnaha ściaha Rasijskaj Fiederacyi» ŭ dačynieńni da bas-hitarysta amierykanskaj rok-hrupy Bloodhound Gang Džareda Chasełchofa (Chieniehana). Incydent adbyŭsia 31 lipienia na rok-kancercie ŭ kłubie «Ibica» ŭ Adesie. Adeskaja palicyja, u svaju čarhu, zaviała na Bloodhound Gang kryminalnuju spravu pa artykule 296 KK Ukrainy (chulihanstva).

U kamientary Bloomberg adznačajecca, što ŭsia hetaja historyja moža zdacca absurdnaj. Tym nie mienš, miarkuje vydańnie, skandał źviarnuŭ uvahu na sumnuju praŭdu pra amierykancaŭ i rasijan. «Kali b Džymi Pop trochi lepš viedaŭ palityčnuju hieahrafiju postsavieckaj prastory, jon by nie paviesiŭ rasijski ściah na ŭkrainskaj scenie», — havorycca ŭ artykule.

«I kali b Chasełchof znajšoŭ čas daviedacca pra zakony krainy, u jakoj jon źbirajecca vystupać, jon by viedaŭ, što za niepavažlivaje staŭleńnie da rasijskaha ściaha naležyć pakarańnie až da hoda turmy», — adznačaje vydańnie i dadaje, što Bloodhound Gang tolki paćvierdzili stereatyp pra amierykancaŭ jak pra nievukaŭ.

The New York Daily News miarkuje, što hrupa Bloodhound Gang adkinuła rasijska-amierykanskija adnosiny, što ŭskładniłasia paśla spravy Edvarda Snoŭdena, jašče dalej nazad.

Narešcie, The Wall Street Journal piša, što ŭsio pačałosia jak pank-vychadka, a skončyłasia kryminalnym rasśledavańniem.

Клас
0
Панылы сорам
0
Ха-ха
0
Ого
0
Сумна
0
Абуральна
0