Viarchoŭny sud Biełarusi nie zadavoliŭ skarhu pradstaŭnikoŭ kampanii «Havary praŭdu!» na admovu Ministerstva justycyi ŭ rehistracyi hramadskaha abjadnańnia. Adpaviednaje rašeńnie ahučyła 7 žniŭnia sudździa Valancina Kulik. Admovu ŭ rehistracyi Miniust arhumientavaŭ dvuma parušeńniami, jakija «nosiać nieadolny charaktar».

U jakaści adnaho z parušeńniaŭ Miniust ukazaŭ na praterminavany harantyjny list ab davańni jurydyčnaha adrasa. Adnak, jak śćviardžajuć pradstaŭniki kampanii «Havary praŭdu!», na čas padačy dakumientaŭ u ministerstva (8 maja) harantyjny list byŭ sapraŭdnym. «Termin jaho dziejańnia zaviaršaŭsia 31 maja, i Miniust ciahnuŭ z adkazam da apošniaha, a potym zajaviŭ, što zaraz u nas niama jurydyčnaha adrasa. Ale my ŭ luby čas mahli b prynieści novy harantyjny list», — zajaviŭ aktyvist kampanii Siarhiej Vaźniak.

Druhoje, z punktu hledžańnia čynoŭnikaŭ, parušeńnie Vaźniak nazvaŭ «prosta duraściu». «U Miniuście śćviardžajuć, što ŭ nas nie vyznačany kolkasny skład praŭleńnia (ci kiraŭnictva?). Ale jon u nas vyznačany ŭ składzie piaci čałaviek, byli pieraličany proźviščy. Tut naohuł niama parušeńniaŭ», — padkreśliŭ jon.

Ustanoŭčy schod «Havary praŭdu!» adbyŭsia 13 krasavika ŭ Minsku. U im uziali ŭdzieł kala 60 delehataŭ ź Minska i abłaściej Biełarusi. Staršynioj arhanizacyi abrany lidar hramadzianskaj kampanii «Havary praŭdu!», kandydat u prezidenty na vybarach 2010 hoda paet Uładzimir Niaklajeŭ, jaho namieśnikam — Andrej Dźmitryjeŭ.

Metaj abjadnańnia źjaŭlajecca «sadziejničańnie pabudovie ŭ Biełarusi demakratyčnaj pravavoj sacyjalnaj dziaržavy, raźvićciu hramadzianskaj supolnaści, narodnaj haspadarki, umacavańniu patryjatyčnych tradycyj biełaruskaha naroda».

Heta była ŭžo treciaja sproba hramadzianskaj kampanii «Havary praŭdu!» prajści aficyjnuju rehistracyju.

Pieršy ŭstanoŭčy schod respublikanskaj daśledča-aśvietnickaj ustanovy «Havary praŭdu!» prajšoŭ u kancy listapada 2010 hoda, druhi — u červieni 2011-ha.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?