U karotkaterminovaj pierśpiektyvie metazhodna dla pavyšeńnia kankurentazdolnaści biełaruskaj ekanomiki pravieści pastupovuju miakkuju devalvacyju nacyjanalnaj valuty.

Takoje mierkavańnie vykazvaje pieršy namieśnik dyrektara Navukova-daśledčaha ekanamičnaha instytuta Minekanomiki Viktar Pinihin u artykule, apublikavanym u lipieńskim numary «Ekonomičieskoho biulletienia», što vydajecca instytutam.

Na dumku Pinihina, ciapier «adbyvajecca dastatkova chutkaje ŭmacavańnie realnaha kursu biełaruskaha rubla (uzrovień inflacyi značna vyšejšy za ŭzrovień devalvacyi)».

«U vyniku chutka hublajucca tyja kankurentnyja pieravahi, jakija atrymali biełaruskija tavary ŭ vyniku devalvacyi rubla ŭ 2011 hodzie. Ź inšaha boku, Nacyjanalny bank praciahvaje skuplać valutu na valutnaj biržy, kab nie dapuścić praźmiernaha ŭmacavańnia biełaruskaha rubla», — kanstatuje Pinihin u artykule.

Na dumku ekanamista, dziejańni Nacbanka dazvalajuć papaŭniać zołatavalutnyja reziervy.

«Ujaŭlajecca, što ŭ karotkaterminovaj pierśpiektyvie metazhodna ŭ intaresach pavyšeńnia kankurentazdolnaści biełaruskaj ekanomiki pravieści pastupovuju miakkuju devalvacyju nacyjanalnaj valuty na asnovie zadavalnieńnia ŭzrastajučaha popytu na zamiežnuju z boku dziaržavy, uličvajučy, što jana sapraŭdy maje ŭ joj patrebu», — adznačaje pieršy namieśnik dyrektara NDEI Minekanomiki.

Tempy devalvacyi nacvaluty treba ŭviazać z dynamikaj asłableńnia kursu rasijskaha rubla, miarkuje ekanamist.

«U jakaści mety možna było b uziać indeks devalvacyi rasijskaha rubla da dołara ZŠA, praviedzienaj u Rasii z pačatku hoda ŭ intaresach abarony nacyjanalnaha rynku va ŭmovach uvachodžańnia ŭ SHA (zamiest taryfnaj abarony) i pavyšeńnia cenavaj kankurentazdolnaści na suśvietnym rynku rasijskich tavaravytvorcaŭ», — miarkuje Pinihin.

Jak paviedamlałasia raniej, apytańni Nacbanka pakazvajuć, što biełaruskija pramysłovyja pradpryjemstvy paličyli b za lepšaje bačyć niekatoraje źnižeńnie kursu biełaruskaha rubla.

Biełaruskija ekanamisty, a taksama pradstaŭniki mižnarodnych finansavych arhanizacyj raniej kanstatavali, što ŭmacavańnie kursu nacyjanalnaj valuty, što nazirałasia na praciahu 2012 hoda i ŭ pačatku 2013-ha, pryviało da źnižeńnia kankurentazdolnaści biełaruskich pradpryjemstvaŭ na źniešnich rynkach.

«Źnižeńnie kursu rubla ŭ 2012 hodzie našmat adstavała ad značnaj roźnicy ŭ tempach inflacyi z handlovymi partniorami, skaračajučy, takim čynam, atrymanyja raniej pieravahi ŭ śfiery kankurentazdolnaści. Kurs rubla źniziŭsia na 3% u naminalnym efiektyŭnym vyražeńni ŭ 2012 hodzie. Z pryčyny ŭsio jašče značnaj roźnicy ŭ tempach inflacyi pamiž Biełaruśsiu i jaje handlovymi partniorami heta pryviało da pavyšeńnia realnaha efiektyŭnaha kursu na 14%, ukazvajučy na značnaje paharšeńnie cenavaj kankurentazdolnaści Biełarusi», — havorycca ŭ dakładzie Mižnarodnaha valutnaha fondu, jaki byŭ apublikavany ŭ červieni hetaha hoda.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?