Karespandentka radyjo «Svaboda» pieradaje ź miesca padziejaŭ:

«Milicyjanty pilnavali ŭdzielnikaŭ bardaŭskaha festu jašče ad učorašniaha ranku. Kala 20 čałaviek zatrymali ŭ Voršy ci na vyjeździe z horadu. Nia mienš jak 60 čałaviek trapili ŭ aršanski rajadździeł milicyi z aŭtobusnaha prypynku ŭ vioscy Haćkaŭščyna. Padjezd da vioski byŭ blakavany milicejskimi mašynami, i ŭsich zvozili ŭ pastarunak.

Siarod zatrymanych u Haćkaŭščynie byli Andrej Šarenda ź Bieraścia, mienskija aktyvisty Alena Makarevič, Kaciaryna Krasnova, Kaciaryna Halickaja, Źmicier Chviedaruk, Natalla Staraścina i Dzianis Sadoŭski, moładź ź inšych haradoŭ.

Supracoŭniki milicyi, nie składajučy nijakich pratakołaŭ, źmiaścili zatrymanych na niekalki hadzin u rajadździeł, a potym adpuścili ŭsich, aprača Dzianisa Sadoŭskaha. Jaho vinavaciać u niepadparadkavańni supracoŭnikam milicyi: nibyta ŭ časie zatrymańnia jon padrapaŭ ruku adnamu ź milicyjantaŭ. Minułuju noč chłopiec pravioŭ u pastarunku.

Bolš za 5 hadzin daviałosia pravieści ŭ Aršanskim RAUSie mastaku Alesiu Puškinu, jaki sprabavaŭ trapić na Krapivienskaje pole praź milicejskija kardony. Na hetym poli ŭstanoŭlenyja kryž u pamiać ab palehłych vajaroch, a taksama pamiatnaja šylda, jakuju mierkavali ŭračysta adkryć u časie sioletniaha bardaŭskaha festu. Adnak adkryćcia nie adbyłosia, bo z 8 vieraśnia na pole nikoha nie puskajuć milicyjanty i vajskoŭcy. Jany ćvierdziać, što tam pravodzicca raźminavańnie snaradaŭ, jakija nibyta zastalisia na poli z času vajny.

U Dubrovienski rajadździeł milicyi na niekalki hadzin trapiŭ i aršanski aktyvist Juraś Kopcik, jaki zajmaŭsia narychtoŭvańniem drovaŭ dla vohnišča na Krapivienskim poli.

Raz masavaje adznačeńnie ŭhodkaŭ bitvy pad Voršaj nie ŭdałosia, ludzi pačali hurtavacca paasobku. Adna vialikaja hrupa «amataraŭ biełaruskaj bardaŭskaj pieśni» sabrałasia niedaloka ad vioski Krapiŭna, a druhaja – niedaloka ad vioski Siahłava.

Užo ŭ ciemry milicyjanty pačali abšukvać terytoryju ŭzdoŭž šašy Vorša-Dubroŭna. Tamu aršanski aktyvist Hienadź Šepieleŭ na svajoj bajdarcy pa rečcy Krapiŭnie dastaviŭ da adnaho ź impravizavanych vohniščaŭ palityka Paŭła Sieviarynca.

Urańni milicyjanty zatrymali jašče kala 20 čałaviek na bierazie rečki Krapiŭny kala vioski Siahłava. Kala 8-j ranicy pa darozie ŭ kirunku vioski Haćkaŭščyna supracoŭniki milicyi spynili jašče čatyroch udzielnikaŭ bardaŭskaha festu, u tym liku barda Andreja Mielnikava i mastaka Alesia Puškina, jaki trapiŭ u pastarunak užo druhi raz za apošnija sutki.

Usie zatrymanyja prabavili ŭ milicyi bolš za 4 hadziny. Na ich nie składali pratakołaŭ, tolki pierapisali pašpartnyja źviestki.

Na hety momant u Aršanskim RAUSie zastajucca Aleś Puškin i moładzievyja aktyvisty ź Miensku Alena Makarevič i Alaksiej Janušeŭski. Praŭdapadobna, što suprać ich mohuć zavieści kryminalnuju spravu za abrazu dziaržaŭnych symbalaŭ: milicyjanty zaŭvažyli, što niechta z zatrymanych vykinuŭ u akno čyrvona-zialony ściah».

U minułyja hady fest adbyvaŭsia biez ekscesaŭ. Sioleta «ideolahi» ŭzmacniajuć kantrol.

Pad Voršu na Krapivienskaje pole tradycyjna 8 vieraśnia dla kancertu i piknika źjaždžajucca nacyjanalnyja aktyvisty z roznych haradoŭ i dziejačy intelihiencyi.

ZP

Kamentar Redakcyi: Kamień na kamień

Nikoli raniej ułady nie zmahalisia z festam (ź biełaruskaj kulturaj — kancertami bardaŭ, minimalnymi prajavami niezaležnaj inicyjatyvy) tak zaciata, nie było takich masavych zatrymańniaŭ. Adnak i nacyjanalnyja aktyvisty nie byli raniej takimi ćviordymi — mirnaju ćviordaściu — u adstojvańni svaich kulturnych pravoŭ — na historyju, tojesnaść, svabodu schodaŭ. Kamień pačynaje papadać na kamień. Niešta mianiajecca z našyj nacyjaj, niešta, nad čym nie majuć ułady ŭłady.

* * *

Aršanskaje pole

Histaryčnaje miesca Aršanskaje bitvy 1514 hodu — na levym bierazie Dniapra pry ŭpadzieńni ŭ jaho rečki Krapivienki.

Dajezd: z čyhunačnaha vakzała na aŭtobusie ci maršrutcy № 11 da aŭtavakzału (kaniec maršrutu). Dalej — aŭtobusam "Vorša – Dubroŭna" da prypynku "Haćkaŭščyna". Hurtam možna naniać maršrutku z čyhunačnaha vakzału prosta da Haćkaŭščyny.

Taksama aŭtobusam abo maršrutkaj možna adjechać ad pryvakzalnaje płoščy da prypynku “Centar”, zatym ad Centralnaj płoščy, što la “Domu handlu” (prypynak za pomnikam Leninu) možna sieści na aŭtobus ci maršrutku Vorša — Dubroŭna” i jechać da prypynku “Haćkaŭščyna”. Ad prypynku “Haćkaŭščyna” da miesca kala 1 km.

Spadarožnyja cikavostki: pa dva baki Centralnaje płoščy znachodziacca muziej Uładzimira Karatkieviča i Prydniaproŭski park z pomnikam Karatkieviču na miescy domu, dzie prajšło jahonaje dziacinstva.

U parafijalnym kaściole Śv.Jazepa (vuł.Savieckaja) ekspanujecca adzinaja na Biełarusi kalarovaja kserakopija ŭ naturalny farmat viadomaj karciny ChVI st. “Aršanskaja bitva” (aryhinał u Varšavie).

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?