38-hadovy hienieralny dyrektar pradziusarskaha centra «Spamaš» Dźmitryj Baranaŭ pamior ad raptoŭnaha spynieńnia serca. Pra heta paviedamiŭ narodny artyst Biełarusi, kiraŭnik prajekta «Jeŭrafest» Alaksandr Cichanovič sa spasyłkaj na vyniki ŭskryćcia.

Pavodle słoŭ Cichanoviča, Dźmitryj pamior viečaram 9 žniŭnia, znachodziačysia za rulom aŭtamabila. Vypadkovy prachožy bačyŭ, jak jon paśpieŭ pryparkavacca, ale vyjści z mašyny ŭžo nie zmoh. Alaksandr Cichanovič adznačyŭ, što Baranaŭ nikoli nie skardziŭsia na serca. Bolš za toje, jon aktyŭna zajmaŭsia sportam, rabiŭ štodzionnyja prabiežki.

U niadzielu ŭ druhoj pałovie dnia cieła Dźmitryja płanujecca dastavić u žanočy manastyr u Navinkach. Pachavańnie, pavodle papiaredniaj infarmacyi, projdzie ŭ paniadziełak, 12 žniŭnia.

U Dźmitryja Baranava zastalisia baćki i małodšy brat.

Alaksandr Cichanovič viedaŭ Dźmitryja Baranava bolš čym 20 hadoŭ. «Ź jaho imiem źviazany takija viadomyja prajekty, jak „Zorny dyližans“, „Jeŭrafest“ i inšyja, jakija pravodzili telekanały „Biełaruś 1“ i „STV“. Jon byŭ vydatnym prafiesijanałam, adnym z najlepšych maładych pradziusaraŭ našaj krainy», — skazaŭ Cichanovič.

Vysoka vykazvajecca ab prafiesijnych i čałaviečych jakaściach pamierłaha i śpiavačka Alena Łanskaja, pradziusaram jakoj jon byŭ pry padrychtoŭcy da konkursu «Jeŭrabačańnie-2013». «Maja duša razryvajecca na častki. Dzima byŭ adnym ź lepšych, samym lepšym pradziusaram — razumnym, prafiesijnym, adekvatnym. Jon moh jašče tak šmat dać mnie i inšym vykanaŭcam», — skazała Łanskaja BiełaPAN.

Dźmitryj Baranaŭ doŭhi čas pracavaŭ na biełaruskim telebačańni. Letaś jon byŭ zvolnieny z telekanała «Biełaruś 1» paśla skandału vakoł vynikaŭ hałasavańnia hledačoŭ na «Jeŭrafeście» — nacyjanalnym konkursie pa adbory vykanaŭcy na «Jeŭrabačańnie».

Aficyjna ŭ finale «Jeŭrafestu» ŭ 2012 hodzie pieramahła Alena Łanskaja, ale hety vynik vyklikaŭ nieadnaznačnuju reakcyju hramadskaści i, u pryvatnaści, hałoŭnych kankurentaŭ Łanskoj, hurtu Litesound. Šumicha vakoł nacyjanalnaha konkursu vyjšła na ŭzrovień kiraŭnika dziaržavy, jaki rasparadziŭsia razabracca, nakolki abjektyŭna byŭ vyznačany pieramožca konkursu. Pa vynikach pravierki Alaksandr Łukašenka padpisaŭ ukaz ab pryciahnieńni da adkaznaści šerahu słužbovych asob, jakija «nie pryniali naležnych mier pa zabieśpiačeńni abjektyŭnaha i spraviadlivaha adboru biełaruskaha pradstaŭnika na konkursie pieśni «Jeŭrabačańnie». Vymovy byli abjaŭlenyja ministru kultury Paŭłu Łatušku i staršyni Biełteleradyjokampanii Hienadziu Davydźku, zaŭvahi — kiraŭniku Administracyi prezidenta Uładzimiru Makieju, jaho pieršamu namieśniku Alaksandru Radźkovu i vice-premjeru Anatolu Toziku.

Łukašenka daručyŭ «nieadkładna zvolnić asob, vinavatych u skažeńni vynikaŭ hałasavańnia ŭ finale nacyjanalnaha muzyčnaha prajekta «Jeŭrafest». U vyniku byŭ zvolnieny tolki Dźmitryj Baranaŭ — na toj čas vykanaŭčy pradziusar telekanała «Biełaruś 1». Jaho abvinavacili ŭ padtasoŭcy vynikaŭ hałasavańnia, choć mnohija havaryli, što Baranava «zrabili krajnim».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?