Jak paviedamlajuć aktyvisty sajtu radykalnaha ruchu, jany pravodzili spartyŭna-palavyja zbory ŭ rajonie Voŭkavickaha vadaschovišča ŭ Minskim rajonie 10 žniŭnia.
Nie paśpieli aktyvisty raskłaści pałatki, jak ich łahier atačyli šeść aŭtamabilaŭ, ź jakich vyskačyli ludzi ŭ milicejskaj formie i ŭ cyvilnym. Jany z vykarystańniem fizičnaj siły pakłali ŭsich prysutnych na ziamlu tvaram uniz. Pry hetym da Dzianisa Sachara i niepaŭnaletniaha Alaksandra Palakova byli ŭžytyja ślezaciečny haz i kajdanki. Zatym supracoŭniki milicyi pieratreśli rukzaki.
U chłopcaŭ kanfiskavali haziety i atrybutyku. Sa słovaŭ nacbołaŭ, padčas pieratrusu milicyjanty ci supracoŭniki KDB razmaŭlali vyklučna matam, ŭžyvali pahrozy, zapałochvańnie i fizičnuju siłu. Paśla hetaha 11 nacbołaŭ byli dastaŭleny ŭ Ždanovickaje AUS, na ich byli składzienyja pratakoły i na miescy vyniesieny pastanovy za «raśpićcio śpirtnych napojaŭ u hramadskim miescy», choć dziejańnie adbyvałasia ŭ hłuchim lesie i śpirtnyja napoi udzielnikami pachodu nie raśpivali, bo jon mieŭ spartyŭny charaktar, pišuć nacboły.
Tam ža na miescy, namieśnikam načalnika adździaleńnia majoram Piatkievičam byli vyniesienyja i pastanovy ab pryciahnieńni udzielnikaŭ mierapryjemstva da administracyjnaj adkaznaści na sumy štrafaŭ ad 100 da 800 tysiač rubloŭ.
Dzianis Sachar byŭ etapavany ŭ IČU Minskaha rajona da sudu, bo na jaho skłali pratakoł za supraciŭ dziejańniam supracoŭnikaŭ milicyi.