Centralny RAUS Homiela pravodzić pravierku pa fakcie bojki 10 žniŭnia pryblizna, a piataj hadzinie ranicy ŭ hipiermarkiecie «Jeŭraopt».
Jak paviedamiła BiełaPAN časovy vykanaŭca abaviazkaŭ načalnika adździeła infarmacyi i hramadskich suviaziaŭ UUS Homielskaha abłvykankama Śviatłana Urubleŭskaja, vyniki pravierki buduć viadomyja praź niekalki dzion, pakul nie ŭstanoŭlena, chto byŭ zavadataram bojki i chto vinavaty ŭ pravaparušeńni.
Nie hatovyja prakamientavać situacyju i ŭ TAA «Jeŭrahandal» — uładalniku hipiermarkieta «Jeŭraopt». U kampanii adkazvajuć, što pakul raźbirajucca ŭ kanflikcie.
11 žniŭnia ŭ internecie źjaviłasia videa, jakoje zafiksavała bojku naviedvalnikaŭ mahazina i achoŭnikaŭ u «Jeŭraopcie».
Adzin sa śviedak bojki Jaŭhien paviedamiŭ BiełaPAN, što incydent zdaryŭsia ranicaj, kali ŭ mahazinie było pryblizna 20 pakupnikoŭ. «Pracavali ŭsiaho dźvie kasy. Ja staŭ u čarhu. Praz paru chvilin pačuŭ razmovy na pavyšanych tonach — pierada mnoj stajali mužčyna hadoŭ 27 ź dziaŭčynaj, jakoj z vyhladu hadoŭ 25. Pierad imi stajaŭ achoŭnik i patrabavaŭ pakazać ček za šakaładku. Jany adkazvali, što šakaładka ŭžo była kuplena. Achoŭnik praciahvaŭ na čymści nastojvać, i z abodvuch bakoŭ pasypałasia niecenzurnaja łajanka. Nie mahu skazać, chto ź ich pieršy pačaŭ hrubijanić, ale achova da hetaha momantu razmaŭlała cicha i vietliva. Jak tolki mužčyna z žančynaj pasprabavali nakiravacca da vychadu, achoŭnik pačaŭ im pieraškadžać, padyšoŭ druhi achoŭnik, usio supravadžałasia maciernymi słovami i bojkaj mužčyny z achoŭnikam», — apisaŭ padziei śviedka.
Pavodle jaho słoŭ, zaviazałasia bojka pamiž mužčynam i achoŭnikam, dziaŭčyna pasprabavała ich raźniać. Bojka doŭžyłasia niekalki chvilin, u joj udzielničali niekalki achoŭnikaŭ mahazina. Praz paru chvilin prybyli supracoŭniki pazaviedamasnaj achovy ŭ milicejskaj formie, a zatym i narad milicyi.
«U dziaŭčyny byŭ raźbity tvar — jarki siniak źleva pad vokam i kroŭ kala nosa. Chłopiec, jaki zdymaŭ zdareńnie na telefon, skardziŭsia na achoŭnikaŭ hipiermarkieta, što jamu zrabili treščynu na dysplei telefona», — paviedamiŭ śviedka. Narad milicyi zapisaŭ źviestki śviedak. Paciarpiełyja ŭ bojcy dziaŭčyna z mužčynam sieli ŭ milicejskuju mašynu i pajechali.
