U mai internet ablacieli zdymki z terytoryi Minskaha traktarnaha zavoda, zastaŭlenaj tysiačami traktaroŭ. Prajšło try miesiacy, adnak situacyja, hledziačy pa ŭsim, zastajecca raniejšaj, paviedamlaje sajt praca-by.info.
Rabočyja zvalniajucca z pradpryjemstva, nie atrymaŭšy abiacanaj zarpłaty, a kiraŭnictva praciahvaje śćviardžać, što prablem z realizacyjaj pradukcyi niama. Bolš za toje, sajt MTZ horda zajaŭlaje, što «na praciahu šerahu hadoŭ zavod zachoŭvaje za saboj dolu ŭ 8-10% ad suśvietnaha rynku kołavych traktaroŭ, znachodziačysia ŭ vaśmiorcy najbujniejšych suśvietnych vytvorcaŭ».
Fotazdymki terytoryi MTZ, zastaŭlenaj niepradadzienymi traktarami, pieradali ŭ prafsajuz REP pracaŭniki zavoda. Na sustrečy sa staršynioj prafsajuza Hienadziem Fiadyničam jany raskazali, što šmat chto sychodzić z zavoda, tamu što zarobak u paraŭnańni z pačatkam hoda ŭpała.
Hienadź Fiadynič adznačyŭ, što i ŭ mietro visiać abjavy ab vakansijach na MTZ, u pieraliku paznačany bolš za 15 śpiecyjalnaściaŭ. Jon ličyć, što heta śviedčyć ab vialikaj ciakučcy kadraŭ.
— Heta surjoznaja prablema. Pavieličeńnie VUP za košt vypusku vialikaha abjomu pradukcyi, jakuju potym niemahčyma realizavać, vychodzić bokam, — ličyć prafsajuzny lidar. — Rabočyja raskazali nam, što kiraŭnictva źmianiła pałažeńnie ab premiravańni. Zaraz premiravańnie zaležyć ad realizacyi. Heta niespraviadlivaje rašeńnie. Pry čym tut tokar abo frezieroŭščyk, jakim było dadziena źmiennaje zadańnie vyrabić peŭnuju kolkaść detalaŭ. Jany vykanali svaju pracu i pavinny za heta atrymać hrošy.
Na dumku Hienadzia Fiadyniča, jašče adna prablema — zamarožvańnie abarotnych srodkaŭ.
— My jašče nie viedajem, kolki traktaroŭ pieradadziena sielhaspradpryjemstvam ŭ lizinh. I choć mnohim haspadarkam nie patrebna była hetaja technika, jany vymušanyja byli jaje ŭziać i pavinny raźličycca svajoj pradukcyjaj. Voś takaja «ekanomika naadvarot» atrymlivajecca, — padsumavaŭ staršynia prafsajuza REP Hienadź Fiadynič.
Pavodle źviestak Biełstata, u pieršym paŭhodździ ŭ Biełarusi vyrablena 34,4 tys. traktaroŭ dla sielskaj i lasnoj haspadarki, što składaje 90,4% da ŭzroŭniu studzienia-červienia minułaha hoda. Abjom składskich zapasaŭ traktaroŭ na 1 lipienia skłaŭ 11,5 tys. adzinak, abo 200,3% da siaredniamiesiačnaha abjomu vytvorčaści.
Kamientujučy novyja fatahrafii z traktarnaha zavoda, prafsajuzny lidar vykazaŭ zdahadku, što zadača Łukašenki za leta razhruzić składy vidavočna apynułasia niepasilnaj.
praca-by.info
http://praca-by.info/