Salihorski hramadski aktyvist Uładzimir Šyła ličyć nieabchodnym źmianić pravaprymianalnuju praktyku orhanaŭ vykanaŭčaj ułady i sudoŭ ahulnaj jurysdykcyi ŭ suviazi sa stałymi admovami ŭ praviadzieńni masavych mierapryjemstvaŭ. Tolki ŭ minułym hodzie aktyvist atrymaŭ 37 zabaronaŭ na svaje zajavy. Kab źmianić situacyju, jon źviarnuŭsia ŭ Kanstytucyjny sud.
Nahodaj dla zvarotu stała čarhovaje parušeńnie Salihorskim rajonnym vykanaŭčym kamitetam prava aktyvista na mirnyja schody i svabodnaje vykazvańnie svajho mierkavańnia. Havorka pra zabaronu miascovymi ŭładami praviadzieńnia pikietu da Dnia Voli ŭ stalicy šachcioraŭ viasnoj hetaha hoda. U pošukach praŭdy Uładzimir Šyła ŭžo prajšoŭ praz sudy pieršaj i druhoj instancyi, ale nidzie padtrymki nie znajšoŭ.
— U pryncypie, navat pry ciapierašnim «drakonaŭskim» Zakonie «Ab masavych mierapryjemstvach» prava na mirnyja schody moža być harantavanaje ŭ značnaj stupieni.Dziela hetaha dastatkova źmianić pravaprymianialnuju praktyku miascovych uładaŭ i sudoŭ. Z hetaj pryčyny ja i źviartajusia da Kanstytucyjnaha suda, — kaža Uładzimir Šyła.
Jak viadoma, hramadzianie Biełarusi nie majuć prava ŭnosić pytańni na rahzhlad u Kanstytucyjny sud naŭprost, ale ništo nie zabaraniaje sudu vykazvać svajo mierkavanie pavodle zvarotaŭ hramadzian.
— Kali Kanstytucyjny sud nie razhledzić moj zvarot albo paličyć piermanientnyja zabarony masavych mierapryjemstvaŭ adpaviednymi Kanstytucyi, dyk budu źviartacca ŭ mižnarodnyja instancyi, — padsumoŭvaje salihorski aktyvist.
Zrešty, u svaim zvarocie Uładzimir Šyła nie abmiažoŭvajecca prośbaj razhledzieć na pradmiet adpaviednaści Kanstytucyi i mižnarodnym abaviazalnictvam Respubliki Biełaruś pravaprymianialnuju praktyku orhanaŭ vykanaŭčaj ułady i sudoŭ pry vyniasieńni rašeńniaŭ pa praviadzieńni masavych mierapryjemstvaŭ.Aktyvist choča, kab Kanstytucyjny sud prapanavaŭ sudam ahulnaj jurysdykcyi pry vyrašeńni sprečak ab zabaronie na praviadzieńnie masavych mierapryjemstvaŭ sychodzić z pryjarytetu artykułaŭ Mižnarodnaha pakta ab hramadzianskich i palityčnych pravach dy kanstytucyjnaha prava hramadzian na mirnyja schody i na svabodnaje vykazvańnie svajho mierkavańnia. Jon taksama prosić Kanstytucyjny sud pryznać parušeńnie jaho kanstytucyjnaha prava na svabodnaje vykazvańnie svajho mierkavańnia i prava na mirnyja schody z boku orhanaŭ vykanaŭčaj ułady, jakoje vyjaviłasia ŭ nieabhruntavanaj admovie ŭ praviadzieńni masavaha mierapryjemstva. Dziela bolš efiektyŭnaha vyrašeńnia prablemy Uładzimir Šyła ličyć nieabchodnym krokam z boku Kanstytucyjnaha suda prapanavać Nacyjanalnamu Schodu Respubliki Biełaruś unieści adpaviednyja źmieny ŭ Zakon «Ab masavych mierapryjemstvach».
