Kožny z nas naviedvaje restarany i kaviarni. Niezaležna ad nastroju i abstavinaŭ, jakija pryvodziać nas u tuju ci inšuju ŭstanovu, my chočam atrymać dobry i jakasny servis, bo ćviorda ŭśviedamlajem, što płacim za heta hrošy. Mienavita tamu ŭsia
Mabyć, bolšaść aŭtaraŭ takich artykułaŭ maje racyju, i pretenzii haściej restaranaŭ abhruntavanyja. Ale nie kožny naviednik ustanovy charčavańnia — «padarunak dla aficyjanta». I mała chto nad hetym zadumvajecca.
«Naša Niva» sustrełasia ź minskimi aficyjantami, kab daviedacca, što nie padabajecca ludziam, jakija pracujuć u našych kaviarniach i restaracyjach — jak kažuć, «pa toj bok barykadaŭ».
Ludzi, čyich imionaŭ my nie zhadvajem, — pradstaŭniki roznych ustanovaŭ: «Siabry», «fellini», «Biassońnica», «Tempo» i «T.G.I Friday's». Jany nakidali šerah punktaŭ, jakija im nie padabajucca bolš za ŭsio. Čytajcie ŭvažliva, mahčyma, chtości z vas, šanoŭnyja čytačy, paznaje tut siabie.
1) Razdražniaje, kali prychodzić vialikaja kampanija i pačynaje napieraboj kryčać, što choča zamović. Potym dziviacca, čamu ty čahości niedačuŭ. Nierealna słuchać niekalki ludziej adnačasova.
2) Niazručna, kali ludzi ŭspaminajuć, što buduć płacić asobna, tolki tady, kali prosiać rachunak. Nie ŭsie sistemy dazvalajuć zrabić heta ŭ kancy absłuhoŭvańnia.
3) VIELMI złuje, kali hości zasiedžvajucca «na hadzinku» paśla zakryćcia restarana, byccam nikomu zaŭtra ŭ hetym restaranie nie treba ŭstavać, a šostaj na pracu.
4) Što da «hrošaj na čaj», to heta asabistaja sprava kožnaha. Ale mnohija dumajuć, što ich pakidać nieabaviazkova, «bo jany (aficyjanty) zarpłatu atrymlivajuć». Dyk voś, chaj tyja, chto tak dumaje, prosta dla cikavaści prahledziać vakansii ŭ internecie i padumajuć, jaki narmalny čałaviek pojdzie nasicca ceły dzień pa 12 hadzin (u letni čas i vychodnyja navat nie majučy mahčymaści prysieści) za 1,2 młn i navat za 1,8 młn (siaredni akład).
5) Sustrakajucca i takija, chto prychodzić u kaviarniu i pavodzić siabie, byccam jon tam car i boh. Ja vydatna razumieju, što hość zaŭsiody maje racyju, ale ŭsio ž nie varta padymać svaju samaacenku za košt tych, chto nie maje prava adkazać u tym ža tonie.
6) Dzieci — asobnaja tema, tamu što jany lubiać pahulać i ŭ chovanki, i ŭ dahaniałki pa ŭsim restaranie. Baćkam varta pamiatać, što ŭsio heta niebiaśpiečna. Byli vypadki, kali dzieci źbivali aficyjantaŭ, jakija nieśli haračuju kavu abo harbatu ich baćkam.
7) Apošnim časam dla mnohich dziaŭčat «aktualna» prychodzić va ŭstanovu (chaj navat i nievysokaha kłasa) u viačernich strojach i ź jarkim makijažam. Jany patrabujuć popielnicu i łate albo «ekspresa» (jak mnohija ź ich vymaŭlajuć) i zasiedžvajucca hadzinami, čakajučy achvotnych apłacić ich rachunak.
8) Nikoli nie razumieła mužčyn, jakija sprabujuć znajomicca ci flirtavać z nami. Tak, ja ŭśmichajusia jaho žartam, ale ž heta nie tamu, što jany śmiešnyja. Heta častka majoj pracy. A žarty zvyčajna adnolkavyja. Ja ich čuła ŭžo 300 razoŭ.
9) «Miłačka», «zajčyk», «kocik», «małaja» — pakińcie hetyja zvaroty svaim žonkam.
10) Zaŭždy ŭśmichajusia, kali ludzi vykładajuć na stoł usio samaje darahoje z kišeniaŭ. Navošta? Vy chočacie, kab usie ŭbačyli, što ŭ vas jość iPhone, vialiki toŭsty hamaniec i birulka ad BMW? A kali vy zalivajecie vašyja pryłady pivam, to kažacie, što vinavatyja aficyjanty.
Viadoma, kožny z nas moža skłaści ŭłasny śpis na temu taho, što jamu nie padabajecca ŭ restaranie, kramie, na zavodzie i h.d. Takija my ludzi: napisać skarhu ŭ razy lahčej, čym padziaku. Tamu pierš čym krytykavać, padumajcie: mahčyma, vy i sami možacie trapić u taki śpis.
