U Słonimie ź vieraśnia pačnie pracu infarmacyjna-kansultacyjnaja niedziaržaŭnaja ŭstanova «Šehamedkansult».
Jaje viasnoj minułaha hodu zarehistravaŭ doktar Ivan Šeha, ale nie zajmaŭsia ŭstanovaju aktyŭna, bo byŭ mocna zaniaty na asnoŭnym miescy pracy ŭ Słonimskaj CRB.
27 červienia 2013 hodu specyjalista vyšejšaj katehoryi, lekara-traŭmatolaha Ivana Šehu zvolnili z pracy. U hety dzień jamu spoŭniłasia 60, i ź im nie praciahnuli kantrakt.
«Ja zaraz čałaviek volny, na pensii. Ale nie ŭdałosia parvać ź lakarskaj spravaj. Chvoryja pa inercyi ŭsio roŭna iduć da mianie. Voś dniami pryjazdžali z Zelvy dva čałavieki, patrebnaja była kansultacyja pa traŭmatalohii i artapedyi. Telefanujuć i prychodziać tyja, chto mnohija hady lačyŭsia ŭ mianie. Asabliva pažyłyja ludzi, jakija pryvykli chadzić da svajho doktara. Tamu davodzicca i doma prymać amal što kožny dzień, a taksama vyjazdžać dachaty da chvorych. Nie mahu admović ludziam, nie pavaročvajecca jazyk», — raspaviadaje Ivan Šeha.
«Šehamedkansult» źjaŭlajecca infarmacyjna-kansultacyjnaj ustanovaj. Pavodle dakumentaŭ ab jaje raehistracyi, u miežach temy zdarovaha ładu žyćcia jana možna zajmacca vydavieckaj dziejnaściu, zdymać filmy, ładzić biaspłatnyja kansultacyi.
«Kali ž stavić za metu arhanizacyju płatnych medyčnych kansultacyjaŭ pa majoj specyjalnaści, to dadatkova jašče treba prajści licenzavańnie», — raspaviadaje Ivan Šeha, — pakul z hetym prablema, bo niama dobraha pamiaškańnia pad ofis dla ŭstanovy. Ja źviarnuŭsia da kiraŭnika našaha ŽREA, kab toj zdaŭ mnie ŭ arendu dva svabodnyja pakoi, jakija jość u budynku ŽREA. Tam možna było b zrabić narmalny ofis, kab prymać ludziej. Ale hetaje pytańnie jašče treba ŭzhadnić u harvykankamie. Kali nie atrymajecca z ŽREA, to možna źniać kvateru. Jurydyčny adras u mianie ŭžo jość, tam dobraje pamiaškańnie, ale pobač mieścicca majsternia, tamu dla pryjomu pacyjentaŭ toje miesca nie padychodzić«.
Spadar Šeha ličyć, što dziejnaść ŭstanovy «Šehamedkansult» budzie vielmi zapatrabavanaj u Słonimie, bo ŭ balnicy vielmi vostry niedachop lekaraŭ,u tym liku i traŭmatolahaŭ: «Była b alternatyŭnaja medyčnaja niedziaržaŭnaja ŭstanova. Ja baču, što heta patrebna ludziam. Ale navat kali nie atrymajecca atrymać licenziju, nichto mnie nie pieraškodzić na biaspłatnaj asnovie davać parady i kansultacyi tym, kamu jany nieabchodnyja. Ja doktar vyšejšaj katehoryi i nichto dyplom moj u mianie nie adbiraŭ».
