Litvu «ździŭlajuć i zasmučajuć» dziejańni Biełarusi ŭ suviazi z budaŭnictvam AES u Astraŭcy, zajaviŭ ministr zamiežnych spraŭ hetaj krainy Linas Linkiavičus, kamientujučy praviedzienyja 17 žniŭnia ŭ Astraŭcy hramadskija słuchańni pra biaśpieku budučaj stancyi.
«Uźnikaje pytańnie: kali ŭsio idzie biaśpiečna i roŭna, čamu jany nie vykonvajuć patrabavańni Kanviencyi Espaa? Kanviencyja Espaa — pryznany ŭ mižnarodnym maštabie dakumient, mienavita jon vyznačaje pytańni jadziernaj biaśpieki, źviazanyja z hetym pytańni, asabliva kali havorka idzie pra susiednija krainy», — cytuje Linkiavičusa infarmahienctva BNS.
Kiraŭnik MZS u čarhovy raz padkreśliŭ, što publičnyja słuchańni niemahčymyja, pakul Biełaruś nie pradstaviła adkazy na zadadzienyja Litvoj pytańni. «Možna vykazać mierkavańnie, što, mahčyma, hetych adkazaŭ niama, tamu vykarystoŭvajucca takija kancertnyja sposaby dyjałohu. Nam nie patrebnaje šou, nam treba, kab paśladoŭna vykonvalisia patrabavańni Kanviencyi Espaa, jak naležyć», — zajaviŭ Linkiavičus.
Biełaruskija ŭłady, pavodle jaho słoŭ, dahetul nie rastłumačyli, čamu dla budaŭnictva AES abrali mienavita Astravieckuju placoŭku, što za 50 km ad Vilniusa.
Niama adkazu i na pytańnie, čamu Biełaruś nie pravodzić siejśmičnyja vyprabavańni, uličvajučy, što ŭ kancy XIX — pačatku XX stahodździaŭ u hetym miescy byli zafiksavanyja mocnyja ziemletrasieńni.
Litva taksama śćviardžaje, što ŭsio jašče čakaje adkazu na pytańnie, jak buduć pravodzicca raboty pa achaładžeńni reaktara. Astudžać stancyju miarkujecca vadoj raki Nierys (Vilija ŭ Biełarusi), choć sama placoŭka stancyi znachodzicca vyšej za raku i addalenaja ad jaje na 10 km — heta pavyšaje vierahodnaść mahčymych zbojaŭ u pracy achaładžalnaj sistemy.
«Śpiecyjalisty pavinny dać vielmi dakładnyja adkazy. Paśla ich atrymańnia možna pravodzić publičnyja słuchańni, a nie naadvarot», — padkreśliŭ kiraŭnik MZS Litvy. Jon taksama dadaŭ: samaja vialikaja biada ŭ tym, što AES pačali budavać da zaviaršeńnia daśledavańnia ŭździejańnia na navakolnaje asiarodździe.
«Jany ciapier uhraźli ŭ hetaj situacyi i, mabyć, šukajuć niejkija vychady. Kampramisaŭ tut być nijak nie moža, ja chaču vielmi rašuča skazać. Heta nie tak sabie abjekt, heta jadzierny abjekt. Hety prajekt isnuje tolki na čarciažach, jak kažuć śpiecyjalisty, tolki ŭ prajektach, jon nidzie nie byŭ realizavany. Tamu nie moža być nijakich kampramisaŭ adnosna daśledavańnia ŭździejańnia na navakolnaje asiarodździe», — skazaŭ Linkiavičus.
Jak raniej paviedamlaŭ BiełaPAN, słuchańni ŭ Astraŭcy pravodzilisia pa inicyjatyvie biełaruskaha boku nasupierak pazicyi aficyjnaha Vilniusa. Biełaruskija čynoŭniki aznajomili pradstaŭnikoŭ litoŭskaj hramadskaści z tryma dakładami na temu biaśpieki budučaj AES dla nasielnictva i navakolnaha asiarodździa Biełarusi i
Biełaruski bok, nahadajem, nie prymaje pretenzii Litvy i śćviardžaje, što padaŭ litoŭskim śpiecyjalistam vyčarpalnyja adkazy na ŭsie pytańni, jakija datyčacca ŭźviadzieńnia AES.
