U ofisie «Biełaruśkalija» — adnaho z najbujniejšych vytvorcaŭ mineralnych uhnajeńniaŭ u śviecie — adbyłasia presavaja kanferencyja kiraŭnictva pradpryjemstva.
Niahledziačy na toje, što karespandenta «Svabody» tudy nie dapuścili, z dapamohaj akredytavanych kalehaŭ my sačyli za tym, što adbyvałasia za začynienymi dźviaryma ŭ Salihorsku.
Padstavaj da razmovy z žurnalistami stała stanovišča na rynku mineralnych uhnajeńniaŭ u vyniku razryvu adnosinaŭ z rasiejskaj kampanijaj «Urałkalij». Pry kancy lipienia «Ŭrałkalij» spyniŭ ekspartny prodaž kalijnych uhnajeńniaŭ praz ekskluziŭnaha pastaŭščyka — «Biełaruskuju kalijnuju kampaniju» — i vyznačyŭ adzinym kanałam zbytu daččynaje padraździaleńnie «Ŭrałkalij-Trejdynh». Rasiejski bok abvinavaciŭ biełarusaŭ u parušeńni damovaŭ i niesankcyjanavanaj adhruzcy syraviny ŭ abychod partneraŭ. Usie dalejšyja sproby damovicca zajšli ŭ tupik.
Siońnia hieneralny dyrektar «Biełaruśkalija» Valer Kiryjenka zajaviŭ, što realizacyja kalijnych uhnajeńniaŭ praź inšych trejderaŭ nikomu nie naniesła strataŭ — maŭlaŭ, usiaho pa vyšejšych koštach, čym było vyznačana damovami ŭ ramkach «Biełaruskaj kalijnaj kampanii», pradadziena mienš za 90 tysiač ton pradukcyi. Da taho ž jon abvinavaciŭ rasiejcaŭ u tym, što tyja nia vytrymali damoŭlenaściaŭ «płaŭnaha razvodu» ciaham hodu, a pajšli na metanakiravanaje abvastreńnie sytuacyi. Narešcie, dapuściŭ hiendyrektar, admova rasiejcaŭ ad supracy ź biełaruskim bokam mahła mieć na mecie dalejšy rejderski zachop «Biełaruśkalija».
Tym nia mieniej nastupstvy kanfliktu nie prymusili siabie doŭha čakać. Jak i prahnazavaŭ hieneralny dyrektar «Urałkalija» Ŭładzisłaŭ Baŭmhiertner, asłableńnie manapolii niepaźbiežna pryviadzie da padzieńnia koštaŭ na chlorysty kalij u śviecie. I sapraŭdy: radykalnaha pierahladu damovaŭ (pryčym pavodle ŭžo padpisanych kantraktaŭ) patrabujuć hałoŭnyja spažyŭcy biełaruskaj pradukcyi — Kitaj i Indyja. Kali letaś Kitaj nabyvaŭ uhnajeńni pa 470 dalaraŭ za tonu, to ŭ ramkach novych kantraktaŭ na druhoje paŭhodździe 2013-ha i na nastupny hod jon maje namier skinuć canu nižej za 300 dalaraŭ. Tarhujecca i Indyja, jakaja pahražaje ŭdvaja skaracić pastaŭki biełaruskaj pradukcyi ŭ vypadku, kali Miensk nie pahodzicca pierahledzieć košty.
Pavodle Valera Kiryjenki, niahledziačy na demarš «Urałkalija», «Biełaruskaja kalijnaja kampanija» zachavaje status handlovaha ahienta salihorskaha pradpryjemstva i budzie aryjentavacca na vypracoŭku indyvidualnaj stratehii. Aproč taho, spadar Kiryjenka ličyć upłyŭ rasiejcaŭ na ŭsiaśvietny rynak mocna pierabolšanym: na jaho dumku, niama vytvorcy, jaki moža ŭ adzinočku źmianiać sytuacyju na rynku.
Varta zhadać, što pik cenaŭ na chlorkalij byŭ u 2008 hodzie. Tady na kožnaj tonie pastaŭščyki zarablali pad 1000 dalaraŭ. U pary ź niekantralavanym ekspartam naftapraduktaŭ, vyrablenych z tannaj rasiejskaj nafty, biudžet mieŭ zvyšprybytki, jakimi, zrešty, biełaruskija ŭłady tak i nie zmahli jak maje być rasparadzicca.
Novyja ŭmovy haspadarańnia niepaźbiežna adabjucca nia tolki na ekanamičnym stanoviščy pradpryjemstva, a i na ŭsim biudžecie Biełarusi. «Biełaruśkalij» — adzin z asnoŭnych pastaŭščykoŭ valuty ŭ dziaržaŭnuju skarbonku: pa vynikach 2012 hodu ad prodažu mineralnych uhnajeńniaŭ pastupiła kala 3 miljardaŭ dalaraŭ, abo blizu 270 miljonaŭ dalaraŭ kožny miesiac. Ale sioleta hetyja ličby mohuć być istotna adkarektavanyja.
Ciapier biełaruski ŭrad namahajecca viarnuć stračanyja pazycyi, śpiešna šukajučy novych partneraŭ. Tak, paviedamlajecca, što padpisali pahadnieńnie ab sumiesnym prodažy mineralnych uhnajeńniaŭ z katarskaj kampanijaj «Muntajat», a taksama vymaloŭvajecca linija na stratehičnaje supracoŭnictva z kampanijaj «Sertrading» z San-Paŭłu, kab pastaŭlać pradukcyju na brazylski rynak. Ale ci zmohuć paśpiešlivyja zachady kampensavać straty ŭ vyniku dačasnaha razychodžańnia pazycyj z «Urałkalijem»?
