Biełaruska Natalla (imia pa prośbie źmienienaje) žyvie ŭ Livanie. Jana pracavała ŭ kłubach, a zatym vyjšła tam zamuž. Dla žančyny incydent z vykradańniem biełaruski Śviatłany Markijanovič siryjskimi paŭstancami staŭ niečakanaściu. Choć znajomyja žančyny nie byli, ale pa-ziamlacku pieražyvaje. A ŭ hetaj historyi bačyć peŭnyja niestykoŭki.
— Ja pračytała artykuł, u jakim bos dziaŭčyny skazaŭ, što jana kala troch hadzin sieła ŭ mašynu ź siryjskimi numarami i źjechała [pabłytała z małdavankaj Karynaj Kolca, jakaja, imavierna, pracavała razam ź biełaruskaj Markijanovič i razam ź joj źnikła — NN]. Dyk voś, u Livanie nikoli i ni za što ciabie navat u kramu ni z kim nie adpuściać! Čuvak musić zapłacić 50-100 dalaraŭ. Pry hetym bos abaviazany zapisać numar telefona i numar mašyny. Sama jana nie maje prava ŭ mašynu siadać. Heta značyć, bos albo viedaŭ tych ludziej, albo ŭ jaho jość numary. Heta pa-pieršaje.
Pa-druhoje,
pašpart Śviety pavinien być u bosa taho miesca, dzie jana pracuje. Bo pašpart zabirajuć, a dajuć kopiju. Kali pašpart u bosa, jak dziaŭčyna mahła pierajechać miažu? Kali pašparta ŭ jaje niama, značycca, jon jaje pradaŭ.
A pa-treciaje, u Livanie ŭ ciabie volny čas z 13.00 da 20.00. Kali ty spaźniaješsia na 5 chvilin, tabie pačynajuć telefanavać i šukać. A možacie sabie ŭjavić, kali jana try dni na pracu nie vyjšła!
A jość ža jašče emihracyjnaja słužba, jakaja prychodzić i praviaraje ŭsich. Kali b jaje nie znajšli, heta skandał! Bosu dastałosia b, i jaje šukali b. Livan pra taki skandał uvohule nie viedaje. Majo mierkavańnie, što treba pačynać z pošukaŭ bosa i spytacca pra pašpart.
«NN»: A navošta zabirajuć pašparty?Natalla: Kab dziaŭčaty nie spakusilisia na bahatych livancaŭ, a pracavali. Ujavicie, stolki mahčymaściaŭ: kłuby, bary, bahatyry. Kali pašparty na rukach, to možna na pracu nie vyjści. Voś i zabirajuć, kab nie było kudy padziecca.
Zabirajuć u aeraporcie i addajuć u aeraporcie. Ale kłub niasie 100-pracentnuju adkaznaść za kožnuju ź dziaŭčat.
«NN»: Vy viedali, dzie pracavała Śviatłana?
Natalla: Nie, bo mahła b raskazać bolš. Ja viedaju amal usie kłuby tut. Ale nie dumaju, što jana pracavała ŭ dobrym miescy. Tamu,
mahčyma, i bos pradaŭ jaje. Ale moža być i što joj prapanavali hrošy za videa, a sama jana dzie-niebudź chavajecca.
Ale ŭ heta nie chaču vieryć, chacia tak było b lepš, čym siadzieć u zakładnikach u Siryi.
«NN»: Vas na hetym videa ničoha nie naściarožyła?
Natalla:
Nadta biełyja majki. I ŭ dziaŭčat vałasy pamytyja. Ja tut, u Livanie, amal kožny dzień hałavu myju praź śpioku. Vyhladaje, što im dali duš pryniać. Dziŭna.
«NN»: Vy daŭno žyviacie ŭ Livanie, padobnyja vypadki pryhadvajecie?
Natalla: Ja ŭžo dva hady tut. Vyjšła zamuž. I ŭ mianie šmat siabrovak. Ja adpracavała šeść kantraktaŭ i ničoha padobnaha nie bačyła. Niešta nie składvajecca — i ŭsio. Maje siabroŭki taksama šakavanyja: jak takoje mahło zdarycca.
Usia sprava ŭ pašparcie: kali dakumient u bosa, mahčyma, jaje i vykrali.
«NN»: A ŭ Livanie adčuvalna, što ŭ Siryi idzie vajna?
Natalla: Šmat siryjcaŭ — tak, a pa-inšamu ja nie adčuvaju. Voś bombu ŭzarvali, ale «Chiezbała» nie adkazała. Pakul u nas cicha, ale my ŭsie chvalujemsia — ci mała što.
«NN»: A jakoje staŭleńnie da biełarusaŭ?
Natalla: Nas tut nie tak šmat. Bolš ukrainak i rasijanak. Dla livancaŭ Biełaruś nie asabliva viadomaja kraina. Tamu my dla ich prosta «rašen». U mianie tut prablem nikoli nie było.
«NN»: Biełaruskaje MUS paviedamiła, što Śviatłana raniej jeździła na pracu ŭ Livan pa niepracoŭnaj vizie.
Natalla: Tryźnieńnie. Niekali daŭno ŭ Livan možna było pryjechać pa turystyčnaj vizie i pracavać u kłubach vyšejšaha kłasa. Ciapier takoha niama Nie mahu skazać z poŭnaj upeŭnienaściu, ale 99 pracentaŭ daju, što biez pracoŭnaj vizy ŭ kłubie nie papracuješ. Mahčyma, heta byŭ niejki pryton, prabačcie. Ale nie mahu kazać z upeŭnienaściu. Ja nikoli i nie bačyła takich miescaŭ.
Vizu ŭ Livan dajuć na try miesiacy. Ale pavinny viedać, kudy jana jedzie, to bok mohuć praviarać, ci jana pa ŭkazanym adrasie znachodzicca. Na kolki jana jechała?
«NN»: Sa słoŭ babuli, z červienia pa vierasień.
Natalla: Kali na try ci šeść miesiacaŭ, značycca viza pracoŭnaja... Tak prosta źniknuć niemahčyma.
