Pasoł Biełarusi Uładzimir Dražyn byŭ vyklikany ŭ MZS Litvy ŭ suviazi z praviedzienymi 17 žniŭnia ŭ Astraŭcy (Hrodzienskaja vobłaść) hramadskimi słuchańniami z nahody budaŭnictva pieršaj biełaruskaj AES.

Na sustrečy, jakaja adbyłasia 22 žniŭnia, vice-ministr zamiežnych spraŭ Litvy Rałandas Kryščunas zaklikaŭ Biełaruś «vykonvać mižnarodnyja abaviazacielstvy i imknucca da kanstruktyŭnaha i karektnaha dyjałohu ŭ suviazi z realizacyjaj prajekta Biełaruskaj AES u Astraŭcy», paviedamiła pres-słužba litoŭskaha MZS.
«Nielha rabić kampramisy za košt jadziernaj biaśpieki. Raspačaty apošnim časam nievytłumačalny paśpiech niedapuščalny, a vykanańnie mižnarodnych abaviazacielstvaŭ, pieršym čynam Kanviencyi Espaa, u vypadku Biełaruskaj AES nie moža być tolki farmalnym», — zajaviŭ litoŭski čynoŭnik biełaruskamu dypłamatu.
Vice-ministr padkreśliŭ: hałoŭnaja meta Litvy — biaśpieka hetaha abjekta ŭ Biełarusi, jakoj jana budzie paśladoŭna damahacca, bo realizacyja hetaha prajekta moža adbicca na hramadzianach nie tolki Biełarusi, ale i Litvy, na ich pravie na biaśpiečnaje navakolnaje asiarodździe.

Pradstaŭnik MZS Litvy zaklikaŭ biełaruskija ŭłady «ŭstrymacca ad adnabakovych dziejańniaŭ, jakija nie adpaviadajuć mižnarodnym patrabavańniam, a zamiest hetaha padavać padrabiaznuju infarmacyju ŭ adpaviednaści z pałažeńniami Kanviencyi AAN pra acenku ŭździejańnia na navakolnaje asiarodździe ŭ transhraničnym kantekście (Kanviencyi Espaa) i z vysnovami Kamiteta pa realizacyi Kanviencyi Espaa».

Litva pierakananaja, što ŭvaha mižnarodnych arhanizacyj i hramadskaści da prajekta Biełaruskaj AES u Astraŭcy karysnaja i Biełarusi, bo adpaviadaje intaresam biełaruskaha boku pabudavać biaśpiečny abjekt.

MZS nahadała, što sioleta 15 krasavika Kamitet pa realizacyi Kanviencyi Espaa daŭ acenku padadzienym Biełaruśsiu dakumientam i kanstatavaŭ, što Biełaruś nie padała Litvie infarmacyi, nieabchodnaj dla acenki ŭździejańnia na navakolnaje asiarodździe ŭ suviazi z prajektam Biełaruskaj AES, i takim čynam parušyła Kanviencyju Espaa. Kamitet źviarnuŭ uvahu na toje, što kansultacyi majuć kaštoŭnaść tolki ŭ tym vypadku, kali pradstaŭlena ŭsia zapytanaja infarmacyja.

«Biełaruś u červieni dasłała pierakładzienuju na litoŭskuju movu spravazdaču pra ŭździejańnie na navakolnaje asiarodździe za 2011 hod, u dačynieńni da jakoj užo była sfarmulavanaja niehatyŭnaja vysnova Kamiteta Espaa, i pryniała adnabakovaje rašeńnie pravieści publičnaje prezientacyjnaje mierapryjemstva ŭ Astraŭcy», — skazana ŭ paviedamleńni MZS.

Varta adznačyć, što słuchańni ŭ Astraŭcy nie byli pryznanyja nie tolki aficyjnym Vilniusam, ale i mnohimi ekałahičnymi arhanizacyjami Biełarusi i Litvy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?