Siem pradstaŭnikoŭ Rady biełaruskaj intelihiencyi padpisali chadajnictvy ab vyzvaleńni ksiandza Uładzisłava Łazara (śvieckaje imia — Uładzimir Łazar). Siońnia chadajnictvy adpraŭlenyja pa pošcie ŭ KDB.

Jak paviedamlaje pres-słužba arhkamiteta partyi «Biełaruskaja chryścijanskaja demakratyja» (BCHD),

chadajnictvy padpisali Anatol Viarcinski, Zinaida Bandarenka, Lavon Barščeŭski, Uładzimir Kołas, Valeryj Frałoŭ, Alaksiej Karol i Anatol Hulajeŭ.
Hetyja ludzi hatovy ŭziać na siabie piśmovaje abaviazacielstva ab tym, što ŭ vypadku vyzvaleńnia ksiondz Łazar «nie ŭciače ad orhana kryminalnaha pieraśledu i suda, nie budzie supraćdziejničać rasśledavańniu spravy ci razhladu jaho sudom i nie budzie zajmacca złačynnaj dziejnaściu».

Členy Rady prosiać KDB aznajomić zatrymanaha ź ich chadajnictvami. Kali zhoda Łazara budzie atrymanaja, jany hatovy dać padpisku ab asabistym paručycielstvie za jaho ŭ adpaviednaści z zakonam.

Pry razhladzie chadajnictvaŭ pradstaŭniki intelihiencyi prosiać «uličyć charaktar padazreńniaŭ (ci abvinavačvańniaŭ), vystaŭlenych suprać Łazara, asobu padazronaha, jaho ŭzrost, stan zdaroŭja, rod zaniatkaŭ, toje, što jon maje pastajannaje miesca žycharstva, a taksama toje, što adsutničajuć danyja pra toje, što jon moža ŭciačy ad orhanaŭ kryminalnaha pieraśledu ci suda, supraćdziejničać papiaredniamu rasśledavańniu kryminalnaj spravy ci razhladu jaje ŭ sudzie».

Nahadajem, pra zatrymańnie ksiandza stała viadoma praź niekalki dzion paśla taho, jak Alaksandr Łukašenka 26 lipienia paviedamiŭ žurnalistam: supracoŭnik biełaruskich śpiecsłužbaŭ zatrymany za pracu na zamiežnyja dziaržavy. «My niadaŭna zatrymali adnaho sa zdradnikaŭ, jaki ŭ śpiecsłužbach słužyŭ i jaki byŭ praz pradstaŭnikoŭ katalickaj carkvy źviazany z zamiežnymi dziaržavami, i nie tolki zdavaŭ infarmacyju, ale z-za jaho dziejnaści paciarpieli ludzi, jakija pracujuć za miažoj», — skazaŭ Łukašenka.

29 lipienia infarmacyju pra zatrymańnie ksiandza Łazara paćvierdziŭ pradstaŭnik Rymska-katalickaha kaścioła ŭ Biełarusi. «My viedajem pra hety fakt, ale nie majem dakładnaj infarmacyi, za što jon zatrymany. KDB admaŭlajecca ad lubych kamientaraŭ pa hetaj spravie.

Ksiondz Uładzisłaŭ Łazar — hramadzianin Biełarusi, vučyŭsia ŭ Hrodzienskaj sieminaryi, zatym u Polščy. U krasaviku hetaha hoda byŭ pryznačany administrataram z pravami probašča parafii Spasłańnia Duchu Śviatoha ŭ Barysavie. Raniej słužyŭ u Marjinaj Horcy i Rudziensku (Puchavicki rajon Minskaj vobłaści).

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?