Sansłužba ministerstva achovy zdaroŭja Kazachstana nie znajšła faktaŭ parušeńnia jakaści pradukcyi ŭkrainskaj kampanii Roshen.

«Daśledavańnie cukierak kandytarskaj karparacyi Roshen skončyłasia (…). Daśledavanyja ŭzory pavodle pakazčykaŭ adkazvajuć ustanoŭlenym hihijeničnym narmatyvam. Bienzapiren nie vyjaŭleny. U suviazi z tym, što pradukcyi, jakaja nie adpaviadaje hihijeničnym narmatyvam, nie vyjaŭlena, padstavy dla ŭviadzieńnia mier abmiežavańnia ŭvozu pradukcyi Roshen na terytoryju Kazachstana niama», — udakładniŭ čynoŭnik z sanitarnaj słužby.

Nahadajem, naprykancy lipienia Rasspažyŭnahlad zabaraniŭ uvoz u Rasieju kandytarskich vyrabaŭ. Maŭlaŭ, u hetaj pradukcyi byli vyjaŭlenyja parušeńni pavodle normy ŭtrymańnia tłuščaŭ i arhanaleptyki, a ŭ niekatorych vyrabach — bienzapiren. Kiraŭnik Rasspažyŭnahladu Hienadź Aniščanka taksama papiaredziŭ partnioraŭ Rasiei ŭ Mytnym sajuzie ab niedapuščalnaści reekspartu ŭ Rasieju pradukcyi Roshen.

Pravierku pradukcyi ŭkrainskaj karparacyi praviali Kazachstan, Biełaruś, Małdova i Tadžykistan. Jany zajavili, što pradukcyja adpaviadaje ŭsim patrebnym standartam jakaści.

Ułady Małdovy, Tadžykistana taksama nijakaha bienzapirenu va ŭkrainskaj sałodkaj pradukcyi nie vyjavili. Naadvarot, časami rehistrujucca narakańni na jakaść rasijskich praduktaŭ.

U minułym Rasspažyŭnahlad nie raz vykarystoŭvaŭsia ŭ palityčnych metach. Pad jaho zabaronu traplali biełaruskaje małako, małdaŭskija viny, hruzinskaja baržomi — pradukcyja najlepšaj jakaści, lepšaja za rasijskija anałahi. Paśla ŭrehulavańnia kanfliktaŭ pradukcyja adrazu pierastavała być niajakasnaj i viartałasia na rasijski rynak.

Adnačasova sa słodyčami Maskva pastaviła barjery na šlachu impartu ŭkrainskich trub. Na dumku naziralnikaŭ, ciapier Maskva choča sarvać padpisańnie damovy pra asacyjacyju miž Ukrainaj i Jeŭrasajuzam.

Pytańnie, ci dałučycca Biełaruś da Kramla ŭ cisku na Ukrainu, maje istotnaje palityčnaje značeńnie. Raniej niaredka Biełaruś i Kazachstan zajmali ŭ padobnych pytańniach adnolkavyja pazicyi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?