Adkaz Minkultury.
Jak paviedamlaje sajt Art Siadziby, arhanizatary kampanii dziela nadańnia bieł-čyrvona-biełamu ściahu historyka-kulturnaj kaštoŭnaści atrymali ad namieśnika ministra kultury Viktara Kuraša razhornuty adkaz na svoj zvarot.
U adkazie napisana, što prapanova ab nadańni statusu historyka-kulturnaj kaštoŭnaści ŭnosicca ŭ Ministerstva kultury luboj jurydyčnaj abo fizyčnaj asobaj u piśmovaj formie z abaviazkovym jaje abhruntavańniem u adpaviednaści z pałažeńniem «Ab paradku viadzieńnia Dziaržaŭnaha śpisa historyka-kulturnych kaštoŭnaściej Respubliki Biełaruś».
Paśla taho jak abhruntavańnie składuć i dašluć u Ministerstva kultury, jano budzie nakiravana na razhlad u Navukova-metadyčnuju radu. Rada pavinna budzie razhledzieć jaho ŭ 30-dzionny peryjad paśla atrymańnia. Razhlad praduhledžvaje «fiksacyju, navukovuju apracoŭku i mastackuju acenku» bieł-čyrvona-biełaha ściaha jak niemateryjalnaj historyka-kulturnaj kaštoŭnaści.
Kančatkovaje rašeńnie na asnovie vynikaŭ pracy Navukova-metadyčnaj rady, zhodna z zakonam «Ab achovie historyka-kulturnaj spadčyny Respubliki Biełaruś», budzie prymać Saviet Ministraŭ Respubliki Biełaruś.
Tamu arhanizatary kampanii źviartajucca da biełaruskich historykaŭ i navukoŭcaŭ, jakija zacikaŭlenyja ŭ nadańni bieł-čyrvona-biełamu ściahu statusu historyka-kulturnaj kaštoŭnaści, dałučycca da napisańnia i pradstaŭleńnia dakumentalnaha abhruntavańnia hetaj prapanovy. I dapamahčy zrabić, jak napisana ŭ adkazie, «poŭnuju, dakładnuju i jakasnuju fiksacyju abjekta, jakomu prapanoŭvajecca nadać status historyka-kulturnaj kaštoŭnaści, hrafičnymi srodkami».
Źviazacca z arhanizatarami kampanii i dasłać varyjant abhruntavańnia možna praz kantakty na sajcie Art Siadziby.
Darečy, Ministerstva kultury taksama patłumačyła, što ŭ 2008 hodzie takoje pytańnie ŭžo razhladałasia, ale pakolki dakumentalnaha abhruntavańnia, jakoha patrabuje zakon, nie było, to Navukova-metadyčnaja rada prapanovu nie padtrymała.
Tamu, kab zaraz pytańnie znoŭ trapiła na razhlad Rady, treba skłaści adpaviednaje abhruntavańnie.
