U internecie źjaviŭsia videarolik, jaki, pavodle niekatorych zdahadak, źjaŭlajecca tym samym «parnahrafičnym videa», za dačynieńnie da stvareńnia jakoha ŭ Paŭnočnaj Karei byli rasstralanyja 12 artystaŭ. U tym liku eks-siabroŭka ciapierašniaha lidara KNDR Kim Čen Yna, śpiavačka Chien Sonh Voł, piša brytanskaja The Daily Mail.
Na videa try žančyny ŭ dosyć ścipłych (pavodle jeŭrapiejskich standartaŭ) kancertnych kaściumach i kaŭbojskich kapielušach sinchronna tančać pad pieśniu Ełvisa Preśli Aloha Oe. Nijakich scen parnahrafičnaha abo eratyčnaha źmiestu ŭ vystupie artystaŭ niama.
Sam rolik ŭpieršyniu źjaviŭsia na kitajskim videachostynhu YouKu. Jon užo sabraŭ bolš za 700 tysiač prahladaŭ. Jak raspaŭsiudnik videa daviedaŭsia, što mienavita jano i stała pryčynaj pakarańnia artystaŭ, nieviadoma.
Dakładna nieviadoma i toje, ci adbyłosia samo pakarańnie. Navukovy supracoŭnik Instytuta Dalokaha Uschoda rasijskaj Akademii navuk Kanstancin Asmołaŭ upeŭnieny, što hetaja historyja — zvyčajnaja žurnalisckaja «kačka», jakaja maje prapahandysckija mety.
U pieršuju čarhu Asmołaŭ pakazvaje na toj fakt, što pieršaj pra pakarańnie śmierciu paviedamiła paŭdniovakarejskaja hazieta Chosun Ilbo, jakaja viadomaja jak «čempijon krainy pa kolkaści infarmacyjnych „kačak“, zapuščanych u masy».
Salistka adnaho z samych papularnych kalektyvaŭ Paŭnočnaj Karei hurtu Pochonbo Electronic Ensemble Chien Sonh Voł — pavodle čutak, — sustrakałasia z Kim Čen Ynam kala 10 hadoŭ tamu. Hety raman skončyŭsia paśla ŭmiašańnia baćki ciapierašniaha lidara KNDR — Kim Čen Ira. Chien Sonh Voł była vydadziena zamuž za aficera asabistaj achovy baćki dziejnaha paŭnočnakarejskaha lidara, a paźniej stała viadoma i pra viasielle Kim Čen Yna. Jaho žonkaj taksama stała tvorčaja asoba — pieršaja łedzi KNDR Ry Sol Čžu ŭdzielničała ŭ hurcie Unhasu Orchestra.
