Śledstva pa spravie ab źbićci doktara-siryjca ŭ elektryčcy Orša — Minsk skončana i pieradadziena ŭ transpartnuju prakuraturu dla nakiravańnia ŭ sud.

Kančatkovaje abvinavačvańnie, jakoje pradjaŭlena maładomu čałavieku za biespadstaŭnaje źbićcio hramadzianina Siryi, kvalifikavana pa č. 1 art. 339 Kryminalnaha kodeksa Biełarusi — chulihanstva, jakoje supravadžajecca hrubym parušeńniem hramadskaha paradku i ŭžyvańniem hvałtu da paciarpiełaha.

6 lipienia ŭ elektryčcy Orša — Minsk u rajonie stancyi Słabada — Ściapianka małady čałaviek z šumnaj kampanii źbiŭ siryjca, jaki, jak vyśvietliłasia paźniej, źjaŭlajecca kliničnym ardynataram 10- j haradskoj balnicy Minska.

«U niejki momant u vahonie stała šumna, ja padniaŭ vočy i ŭbačyŭ, jak małady čałaviek hadoŭ 18 schiliŭsia nad mužčynam i staŭ nanosić jamu sieryju udaraŭ u hałavu. Mužčyna sprabavaŭ baranicca, ale biezvynikova», — raspaviadaŭ adzin ź vidavočcaŭ.

Padazravanaha ŭdałosia zatrymać tolki na nastupny dzień. Znajści jaho stała mahčyma ŭ tym liku dziakujučy tamu, što vidavočcy źniali tvary maładych ludziej z kampanii na videa.

Śledstva skončyłasia 3 vieraśnia.

Ustanoŭlena, što kanflikt pamiž maładym čałaviekam i doktaram-siryjcam adbyŭsia z-za nieparazumieńnia: siryjcu było zadadziena pytańnie, jakoje toj nie zrazumieŭ da kanca, adkaz nie zadavoliŭ maładoha čałavieka. U vyniku toj biespadstaŭna nanios jamu nie mienš za 5 udaraŭ u tvar. Cialesnyja paškodžańni paciarpiełaha kvalifikavanyja jak lohkija, nie paciahnuli parušeńnia zdaroŭja na praciahły termin.

Śledstva taksama pryjšło da vysnovy, što adbyłosia mienavita chulihanstva — biez jakoha-niebudź nacyjanalnaha składnika.

Abvinavačany pryznaŭ svaju vinu tolki častkova.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?