Siarhiej Sabianin — 51,5%, Alaksiej Navalny — 27%. Takija aficyjnyja vyniki vybaraŭ mera Maskvy. Na trecim miescy kamunist Ivan Mielnikaŭ z vynikam 10%. Pakul štab Navalnaha zajaŭlaje ab falsifikacyjach i patrabuje druhoha turu, palitołah Kirył Koktyš kamientuje dla Jeŭraradyjo pryčyny parazy samaha viadomaha rasijskaha apazicyjaniera.

«Prahrama Navalnaha nie adkazvała na absalutnuju bolšaść zapytaŭ maskvičoŭ, na tyja prablemy, jakija aktualnyja siońnia i buduć aktualnymi zaŭtra. Heta była svojeasablivaja akynskaja pieśnia pra siabie samoha, a nie pra čakańni maskvičoŭ. I hetym možna patłumačyć nizkuju aktyŭnaść vybarščykaŭ u Maskvie».

Jaŭka na maskoŭskich vybarach nasamreč kulhaje — usiaho 33%. Da biełaruskich dasiahnieńniaŭ oj jak daloka, miarkuje lidar Abjadnanaj hramadzianskaj partyi Anatol Labiedźka. Apazicyjanier ličyć, što pa demakratyzacyi Rasija zaraz znachodzicca na tym samym uzroŭni, na jakim Biełaruś była ŭ pačatku 1990-ch. Labiedźka taksama havoryć, što biełaruskaja apazicyja zaraz macniejšaja za Alaksieja Navalnaha i kali b takija ž vybary prajšli ŭ Minsku — nabrała b bolš hałasoŭ, čym apalny błohier.

«Ja vam skažu, što kali b niešta padobnaje na maskoŭskija vybary adbyvałasia ŭ Biełarusi, kab my mieli takija ž mahčymaści, zychodziačy z pracedur, to ŭ nas alternatyŭny kandydat nabraŭ by bolš za 30%. Ja ŭ hetym pierakanany».

Labiedźka taksama ličyć, što elektaralnyja padziei ŭ Rasii nadzvyčaj cikavyja dla biełarusaŭ, bo naŭprost upłyvajuć na situacyju ŭ našaj krainie. Jaho palityčny apanient Ryhor Kastusioŭ z Partyi BNF dumaje zusim inačaj. Havoryć, što chto b tam ni pryjšoŭ da ŭłady — dla biełarusaŭ z uschodu radaści čakać nie vypadaje. A voś vybary mera Minska, miarkuje Kastusioŭ, kandydat ad Partyi BNF moh by vyjhrać biez pytańniaŭ.

«Kali b u Biełarusi byli sapraŭdnyja vybary i hałasy ličylisia b tak, jak ludzi hałasujuć, to pieramoha kandydata ad BNF vielmi i vielmi vierahodnaja. Kali b Partyja BNF vyłučyła hodnaha pradstaŭnika, to jon by adnaznačna moh atrymać pieramohu».

Sustaršynia Biełaruskaj chryścijanskaj demakratyi Vital Rymašeŭski adznačaje, što rasijskija vybary bolš demakratyčnyja, čym u Biełarusi. Jon taksama havoryć, što biełaruskija ŭłady adstajuć ad rasijskich. Maŭlaŭ, uschodnija susiedzi navučylisia pieramahać na vybarach. Albo prynamsi stvarać pierakanaŭčuju karcinu hetaha. Biełaruskim viertykalščykam, na dumku apazicyjaniera, da hetaha vielmi daloka.

«U Minsku kandydat ad Łukašenki dakładna nie maje nijakaha šansu. Ja pierakanany ŭ hetym na 100%. Minsk nieadnarazova chvaravita reahavaŭ na nieadekvatnyja vykazvańni ŭ adras minčan. Dyj u inšych vialikich haradach Biełarusi praŭładnyja kandydaty nie majuć šansaŭ».

Ale pakul demakratyčnych vybaraŭ u Biełarusi niama i našaj apazicyi zastajecca zajzdrościć navat vyniku Navalnaha. I nazirać za novym meram Jekaciarynburha, baraćbitom z narkahandlem Jaŭhienam Rojzmanam. Ad taho, jak jon siabie prajavić na vysokaj pasadzie, moža zaležać los rasijskich praciŭnikaŭ hienieralnaj linii.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?