Alaksandr Łukašenka 9 vieraśnia padpisaŭ ukaz № 401 «Ab prysudžeńni dziaržaŭnych premij Respubliki Biełaruś 2012 hoda».
Jak paviedamlaje pres-słužba prezidenta, prysudžany try premii ŭ śfiery navuki i techniki i try premii ŭ śfiery litaratury, mastactva i architektury.
Dziaržaŭnaj premijaj u śfiery navuki i techniki adznačany cykł prac «Novyja niearhaničnyja złučeńni i materyjały na asnovie mikra- i nanaraźmiernych čaścic: atrymańnie, ułaścivaści, prymianieńnie». «Jon maje vysokuju navukovuju kaštoŭnaść i ŭtrymlivaje vyniki suśvietnaha ŭzroŭniu navizny, atrymanyja za 35-hadovy pieryjad daśledavańniaŭ», — zaznačajecca va ŭkazie. Aŭtarami Michaiłam Arciemjevym, Anatolem Leśnikovičam i Aleham Ivaškievičam upieršyniu sintezavanyja bolš za 100 novych złučeńniaŭ, jakija znajšli prymianieńnie ŭ roznych halinach i ŭ roznych krainach śvietu.
Hetaj premii taksama ŭdastojena praca «Raspracoŭka i šyrokamaštabnaje ŭkaranieńnie nacyjanalnych srodkaŭ abarony dakumientaŭ, kaštoŭnych papier i asabliva kaštoŭnych abjektaŭ na asnovie hałahrafičnych mietadaŭ». «Aŭtarami Leanidam Taninym, Piatrom Majsiejenkam i Mikałajem Makarevičam raspracavanyja i ŭkaranionyja nacyjanalnyja nadziejnyja srodki abarony ad padroblivańnia kaštoŭnych papier, što majuć suśvietny pryjarytet, — havorycca ŭ dakumiencie. — Navukovaja kaštoŭnaść hetaj pracy zaklučajecca ŭ raźvićci fizičnych pryncypaŭ i raspracoŭcy ŭnikalnych hałahrafičnych technałohij, jakija źjaŭlajucca biassprečnym dasiahnieńniem biełaruskich vučonych i inžynieraŭ».
Aprača taho, dziaržpremijaj u halinie navuki i techniki ŭznaharodžana praca «Raspracoŭka i asvajeńnie vytvorčaści śpiecyjalnych kołavych šasi i ciahačoŭ čaćviortaha pakaleńnia vajenna-techničnaha i dvajnoha pryznačeńnia». Va ŭkazie zaznačajecca, što aŭtary Andrej Hałavač, Juryj Nikałajeŭ i Jaŭhien Harko «stvaryli asnovu dla arhanizacyi ŭ Biełarusi ŭłasnaj vytvorčaści śpiecyjalnych kołavych šasi i ciahačoŭ, jakija istotna pierasiahajuć pa svaich charaktarystykach mašyny papiaredniaha pakaleńnia».
Dziaržpremijaj u śfiery litaratury, mastactva i architektury adznačany śpiektakl «Pinskaja šlachta» pavodle pjesy Vincenta Dunina-Marcinkieviča. «Tvorčy kalektyŭ Nacyjanalnaha akademičnaha teatra imia Janki Kupały stvaryŭ śpiektakl, jaki staŭ vybitnoj źjavaj u teatralnym žyćci krainy, jaki ŭjaŭlaje saboj jarkaje ŭvasableńnie kłasiki sučasnymi sceničnymi srodkami. Hetaja pastanoŭka atrymała vysokuju acenku i pryznańnie nie tolki ŭ našaj krainie, ale i za miažoj», — havorycca va ŭkazie. Premija prysudžana narodnamu artystu Biełarusi Viktaru Manajevu, mastaku-pastanoŭščykuVolzie Mackievič i kampazitaru Andreju Zubryču.
Za vysokija dasiahnieńni vakalnaha i vykanalnickaha majsterstva dziaržaŭnaj premii ŭdastojena artyst-vakalist — viadučy majstar sceny Nacyjanalnaha akademičnaha Vialikaha teatra opiery i baleta Respubliki Biełaruś Nina Šarubina. «Artystka, jakaja vałodaje hołasam redkaha tembru, za karotki čas stała viadučaj salistkaj teatra opiery i baleta, demanstrujučy cudoŭny vakał, virtuoznuju pieŭčuju techniku i talent dramatyčnaj aktrysy. Jaje tvorčaść źjaŭlajecca najvyšejšym dasiahnieńniem biełaruskaha mastactva apošniaha času», — zaznačajecca ŭ dakumiencie.
Dziaržaŭnaj premijaj za šmatprofilny kulturna-spartyŭny kompleks «Minsk-Arena» adznačany aŭtarski kalektyŭ u składzie Valeryja Kucko, Uładzimira Budajeva i Anatola Šabalina, jaki stvaryŭ «najbujniejšy spartyŭna-kulturny abjekt na terytoryi krainy, što pa svaim maštabie, inžyniernym i mastackim vyrašeńni možna paraŭnać z najlepšymi ŭzorami sučasnaj suśvietnaj architektury», havorycca va ŭkazie.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
