Patańniełyja ź lipienia akcyi kampanii ŭčora ŭźlacieli amal na 10%. Uhoda da hetaha času nie paćvierdžanaja, užo nazvanyja patencyjnyja pakupniki ad jaje adchryščvajucca. Ale rasijskamu vydańniu «Kommmiersant» stała viadomaje imia jašče adnaho pretendenta — heta Arkadź Rotenbierh, jaki pracuje na chimičnym rynku z 2011 hoda.
Uskładnić pieramovy moža toje, što, pavodle dadzienych «Kommiersanta», Sulejman Kierymaŭ hatovy pradać svoj pakiet tolki na tracinu daražej za rynkavuju canu.
Učora kaciroŭki akcyj najbujniejšaha suśvietnaha vytvorcy kaliju «Urałkalij» na MMVB vyraśli na 8,7%. Na Łondanskaj fondavaj biržy cana padniałasia jašče macniej — amal na 10%. Heta pieršy surjozny rost «Urałkalija» z 30 lipienia, kali abjava ab skasavańni partniorstva z «Biełaruśkalijem» abvaliła jaho akcyi amal na 20%. U minułuju piatnicu zachoŭvałasia źnižeńnie na 14%. Učora ž «Urałkalij» kaštavaŭ tolki na 5,5% mienš, čym da skandalnaj abjavy.
Krynicy «Kommiersanta» na rynku źviazvajuć heta z čutkami ab prodažy doli asnoŭnym akcyjanieram «Urałkalija» Sulejmanam Kierymavym (vałodaje 21,75%). Pavodle nieaficyjnych viersij, pieramovy ab prodažy pakieta viaducca ź pieciarburhskim bankiram Uładzimiram Kohanam, a taksama z uładalnikam AFK «Sistema» Uładzimiram Jeŭtušenkavym i ŭładalnikam «Ruśniefti» Michaiłam Hucaryjevym. Adnak Jeŭtušenkaŭ učora aficyjna abvierh cikavaść da «Urałkalija». U Kohana, pavodle dadzienych krynic «Kommiersanta», «pakul niama srodkaŭ na ŭhodu i ŭchvały źvierchu». «Kommiersantu» ŭdałosia vyśvietlić imia jašče adnaho pretendenta — krynicy, znajomyja ź situacyjaj vakoł kampanii, zapeŭnivajuć, što najbolš imaviernym pakupnikom akcyj «Urałkalija» źjaŭlajecca Arkadź Rotenbierh. Krynicy vydańnia kažuć, što «pieramovy Kierymava i Rotenbierha znachodziacca ŭ vielmi aktyŭnaj stadyi», ale kali moža być zavieršanaja ŭhoda, nie ŭdakładniajuć. Pradstaŭnik Rotenbierha situacyju nie kamientuje.
A. Rotenbierh jak pakupnik padabajecca ŭładam, bo jon «pravierany i nadziejny», kažuć surazmoŭcy «Kommiersanta».
«Prablem, jak z Sulejmanam Kierymavym, u hetym vypadku čakać nie varta», — tłumačyć adzin ź ich. Pavodle jaho słovaŭ, Alaksandr Łukašenka daŭ zrazumieć, što supracoŭničać z «Urałkalijem» za Kierymavym nie budzie, a Arkadź Rotenbierh «usich zadavalniaje». Pradprymalnik nie raz abiacaŭ pašyryć chimičny biznes. U sakaviku 2012 hoda jaho Nacyjanalnaja chimičnaja hrupa (NCHH) damoviłasia z «Hazpramam» i ŭładami ab realizacyi prajektaŭ raźvićcia hazachimičnaj vytvorčaści na Dalokim Uschodzie. Havorka išła ab budaŭnictvie bujnoha kambinata pa vytvorčaści azotnych uhnajeńniaŭ u Chabaraŭskam krai ci Prymorji. Tady ž NCHH nakiravała «Hazpramu» zapyt na zakupku hazu ŭ abjomie kala 3 młrd kubamietraŭ u hod. Ale prajekt da hetaha času ŭ stadyi raspracoŭki. Krynicy «Kommiersanta» nie raz kazali pra cikavaść Rotenbierha da «Taljaciazotu» Uładzimira Machłaja.
Ale pieramovy ź lubym z pretendentaŭ na «Urałkalij» mohuć uskładnicca tym, što Sulejman Kierymaŭ hatovy pradać dolu tolki istotna daražej za rynkavuju canu. Pa słovach krynicaŭ «Kommiersanta», jon prosić za 21,75% akcyj «Urałkalija " kala $4,5 młrd (učora na MMVB hety pakiet kaštavaŭ $3,4 młrd). Adzin z surazmoŭcaŭ «Kommiersanta» miarkuje, što prafinansavać uhodu mohuć VTB i VEB, ale krynica ŭ VTB heta abviarhaje. U «Nafta Maskva» Sulejmana Kierymava
Kanstancin Juminaŭ z Raiffeisenbank upeŭnieny, što «Urałkalij», jaki hienieruje bolš za 50% rentabielnaści pa EBITDA, «cikavy lubomu, u kaho znojducca hrošy». Da taho ž kali ŭ kampanii źmienicca akcyjanier, «usio moža viarnucca ŭ svajo rečyšča» — naprykład, kampanija vierniecca da supracoŭnictva ź biełaruskim vytvorcam abo da stratehii «vysokaja cana važniejšaja za abjomy». Juminaŭ ličyć Arkadzia Rotenbierha «łahičnym» pretendentam i nie sumniajecca, što jon zmoža znajści finansavańnie dla ŭhody. Adnak dla samoj kampanii mohuć uźniknuć ryzyki — kali doŭh budzie paviešany na «Urałkalij» ci budzie vyrašana dla vypłaty doŭhu naraścić dyvidendy.
