Siaredniaja cana prapanovy kvadratnaha mietra ŭ stalicy Biełarusi składaje ŭžo $1800 i nieŭzabavie moža dasiahnuć dakryzisnaha ŭzroŭniu. U kancy 2007 kvatery kaštavali $2000 za mietr.

Uładalniki minskaha žylla radujucca — štodnia jany bahaciejuć na niekalki sotniaŭ dalaraŭ.

Ci možna vykarystać hety rost cenaŭ i abmianiać minskuju kvateru na nieruchomaść za miažoj? Abtelefanoŭvajem ahienctvy adno za adnym i čujem adnolkavy adkaz: zamiežniki minskimi spalnymi rajonami nie cikaviacca. Tamu ryełtary prapanujuć spačatku pradać žyllo, a paśla šukać apartamienty za miažoj.

Za panelnuju adnapakajoŭku płoščaj 30 kvadratnych mietraŭ u Malinaŭcy nam rajać stavić ceńnik jak minimum na ŭzroŭni $55 tysiač. A kali pobač z domam narešcie adkryjuć mietro, možna budzie śmieła nakinuć jašče paru tysiač dalaraŭ, padkazvajuć ryełtary.

Budziem ličyć, što $55 tysiač (jany ž 42 tysiačy jeŭra) u nas u kišeni. Što možna nabyć za takija hrošy ŭ inšych krainach?

Litva: kuplaje chto choča

U vilenskich ahienctvach nieruchomaści z hatoŭnaściu vysyłajuć śpis kvateraŭ na prodaž. Kvadratny mietr u litoŭskaj stalicy kaštuje tańniej, čym u Minsku — kala $1500-1600. Heta značycca, nam pasujuć maleńkija dvuchpakajoŭki.

Naprykład, za kvateru płoščaj 43 m2 u cahlanym piacipaviarchoviku byłoha zavadskoha internata ŭ spalnym rajonie Žyrmuny prosiać $36 tysiač. A za adnapakajoŭku na 35 m2 za niekalki kiłamietraŭ ad centra — $53 tysiačy.

U kurortnaj Pałanzie za tyja ž hrošy možna pryhledzieć i nievialikuju trochpakajoŭku — praŭda, dalekavata ad mora.

A voś damy pradajucca redka, bo zamiežnikam zabaraniajecca kuplać ziamielnyja ŭčastki.

U litoŭskaha žylla jość istotny minus.

Za kamunalnyja pasłuhi daviadziecca płacić istotna bolš, čym u Biełarusi, asabliva ŭzimku. U chałodnyja miesiacy kvarpłata ŭ adnapakajovaj chruščoŭcy moža dasiahać 1,5 miljona rubloŭ.

Razam z tym jość i vyhada.

Pa-pieršaje, heta cana. Pa-druhoje, mahčymaść atrymać šmatrazovuju vizu. Pa-treciaje, žyllo ŭ susiedniaj stalicy možna razhladać jak mahčymaść schavacca ad biełaruskich pravaachoŭnikaŭ i padatkavikoŭ. Pa takim šlachu, jak miarkujuć litoŭskija ŚMI, pajšli mnohija biełaruskija biznesoŭcy — navat ułaśniki kramaŭ «Jeŭraopt». Niekatoryja nabyvajuć žyllo na budučyniu dzieciam.

A voś pretendavać na vid na žycharstva tolki praz vałodańnie nieruchomaściu nielha.

Polšča: patrebny dazvoł

Pryjechaŭšy ŭ Polšču navat z $100 tysiačami ŭ kišeni, prosta tak nabyć katedž ź placam nie ŭdasca.

Zamiežnikam treba atrymać dazvoł ad čynoŭnikaŭ, a spačatku abhruntavać svaju suviaź z Polščaj i rastłumačyć, navošta kuplajecca ziamla. Vyklučeńnie robicca dla tych, chto ŭžo pražyŭ na terytoryi krainy bolš za 5 hadoŭ albo znachodzicca ŭ šlubie z hramadzianinam Polščy.

Što datyčyć kvater, to ich možna kuplać svabodna. Siaredniaja cana kvadratnaha mietra ŭ Varšavie składaje $2300.

Heta značyć, na hrošy ad minskaj adnapakajoŭki ničoha nie nabudzieš. Nienašmat mienšyja ceny i ŭ Krakavie.

U Biełastoku za kvadratny mietr daviadziecca zapłacić kala $1300 — udasca kupić adnapakajoŭku, ale bolšuju pa płoščy, čym u Minsku.

Ispanija

Kryzis, jaki apanavaŭ ispanski rynak nieruchomaści, nie daje spakoju patencyjnym inviestaram. Jašče b — kvatery i katedžy pradajucca pa minimalnych cenach!

Ispancy brali kredyty na žyllo, adnak mnohija ź ich viarnuć hrošy nie zmahli. Daviałosia addavać žyllom. Ciapier banki raspradajuć jaho, kab choć častkova kampiensavać svaje straty.

Ci možna paśpieć jašče štości ŭchapić sa stała? Naŭrad ci.

U prodažy najbolš pradstaŭlena ŭcenienaje kurortnaje žyllo, ale jano ŭsio adno darahoje. Ceny za viły pačynajucca ad $200 tysiač. Zdavać u arendu ich budzie składana, bo rynak i tak pieranasyčany. Darečy, kala 10% koštu žylla daviadziecca addać u vyhladzie padatkaŭ.

Vyhadnyja prapanovy ŭ prybiarežnych haradach. U Alikante piacikapakajoŭka płoščaj 100 m2pradajecca za $45 tysiač. Praŭda, da mora budzie daloka.

Raźličvać na darmavyja kvatery ŭ miehapolisach nie varta.

U Madrydzie i Barsiełonie kvadratny mietr navat u kryzis kaštuje kala $4000.

Nieruchomaść u Ispanii zastajecca dla biełarusaŭ pryhožaj kazkaj, bo ŭ realnaści žyćcio ŭ krainie daražejšaje, čym u Biełarusi, a znajści pracu dla mihranta niejmavierna składana.

Pavodle padlikaŭ ispanskich statystykaŭ, siarod zamiežnikaŭ, jakija letaś nabyli ŭ krainie bolš za 100 abjektaŭ nieruchomaści, biełarusaŭ niama.

Załataja Maskva

Z našych $80 tysiač u maskoŭskich ahienctvach nieruchomaści strymana paśmiajalisia.

«Samyja tannyja adnapakajoŭki ŭ našaj bazie kaštujuć ad $160 tysiač. Z vašaj sumaj maje sens pryhledziecca da Padmaskoŭja. U Arechavie-Zujevie, Sierpuchavie, Kałomnie — 100 km ad Maskvy --  možam padabrać vam adnapakajoŭku płoščaj 35-45 m2», — pryjšoŭ adzin z adkazaŭ.

* * *

Siaredniaja cana kvadratnaha mietra na druhasnym rynku

Maskva — $5000

Varšava — $2300

Kijeŭ — $2100

Minsk — $1800

Vilnia — $1550

Ryha — $1300

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?