Pavodle tradycyi haradskoje śviata prachodzić u druhuju subotu vieraśnia. Sioleta Minsku spaŭniajecca 946 hadoŭ z momantu pieršaha zhadvańnia ŭ «Apovieści minułych hadoŭ».

Asablivaściu hetaha śviatkavańnia staŭ pieranos centralnych mierapryjemstvaŭ u Vierchni horad, jaki chutka budzie piešachodnym.

Haradskija ŭłady vyrašyli admovicca ad vialikich sceničnych placovak kala Pałaca sportu i ŭ parku Pieramohi. «Asnoŭnyja błoki, temy śviata sioleta prapanavana pravieści ŭ rajonnych zonach — Łošycki park, park imia Paŭłava, studenckaja vioska, u jakoj projdzie maładziožnaje śviata. My imknulisia maksimalna pieranieści akcenty śviatočnych mierapryjemstvaŭ u rajony», — paviedamiła žurnalistam u pačatku tydnia načalnik upraŭleńnia kultury Minharvykankama Vitalina Rudzikava.

Pavodle jaje słoŭ, 50 z 70 mierapryjemstvaŭ projduć u staličnych rajonach.

Śviata adkryjecca ŭračystym uskładańniem kvietak da abieliska «Minsk — horad-hieroj». Paśla cyrymonii kiraŭnictva horada ŭručyć klučy ad aŭtamabilaŭ, abstalavanych ručnym kiravańniem, invalidam vajennych dziejańniaŭ u Afhanistanie.

Cyrymonija ŭručeńnia ŭznaharod «Minčanin hoda» i śviatočny kancert projduć u Nacyjanalnym akademičnym Vialikim teatra opiery i baleta. Upieršyniu paśla zakančeńnia kancerta na placoŭcy pierad teatram budzie pakazany tvorčy prajekt «Minsk. Historyja sučasnaha horada», padčas jakoha budzie ažyćciaŭlacca 3D-prajekcyja na budynak teatra.

Asnoŭnym miescam narodnych hulańniaŭ 14 vieraśnia stanie Vierchni horad, u jakim budzie rekanstrujavanaja epocha kanca XVIII — pačatku XIX stahodździaŭ:

muzykanty, ramieśniki, žyvyja karciny, mastaki. Na Ratušnaj płoščy budzie pakazana prahrama zaviaršeńnia muzyčna-turystyčnaha siezonu. U skviery razhorniecca knižnaja vystava biełaruskich aŭtaraŭ. Viečaram (z 20.00 da 22.00) ź pieśniami pra Minsk vystupić Nacyjanalny kancertny arkiestr pad kiraŭnictvam Michaiła Finbierha.

Na praśpiekcie Pieramožcaŭ, na zialonaj zonie pamiž abieliskam i Pałacam sportu, projdzie fiestyval histaryčnaj rekanstrukcyi «Minsk histaryčny». Prahramaj praduhledžany mierapryjemstvy, jakija pieradaduć atmaśfieru vysakarodnaha siaredniaviečnaha rycarstva, umovy vajennych łahieraŭ. Finałam fiestyvalu budzie kancertnaja prahrama z udziełam ansamblaŭ siaredniaviečnaj muzyki i fajer-šou, jakoje sioleta zamienić tradycyjny śviatočny salut.

Na piešachodnaj vulicy Karła Marksa adbudziecca zakryćcio fiestyvalu vuličnych teatraŭ Biełarusi i blizkaha zamiežža. Udzielniki projduć ad Michajłaŭskaha skvieru pa vulicy karnavalnym šeściem. Śviata budzie doŭžycca dva dni — 14 i 15 vieraśnia.

U Łošyckim siadzibna-parkavym kompleksie adbudziecca śviata narodnaj tvorčaści, vystava-kirmaš «Horad majstroŭ», a taksama fiestyval «Marožany bum» z udziełam usich vytvorcaŭ marožanaha Biełarusi.

U parku imia Horkaha 14 vieraśnia projdzie fiestyval nacyjanalnych kultur.

Dziciačyja prahramy buduć arhanizavanyja na placoŭcy kala Pałaca dziaciej i moładzi, Dziciačaj čyhunki i va ŭsich parkach.

Pavodle infarmacyi harvykankama, vyjazny handal na Dni horada raściahniecca bolš jak na piać kiłamietraŭ. Prykładna 90 pradpryjemstvaŭ hramadskaha charčavańnia daduć 25-pracentnuju skidku na stravy ŭłasnaha pryhatavańnia. U bujnych handlovych pradpryjemstvach Minska na šerah tavaraŭ buduć davacca skidki 15–30%.

Dziaržaŭtainśpiekcyja Minska siońnia budzie pracavać va ŭzmocnienym režymie. Vadzicielam u śviatočny dzień rekamiendavana pa mahčymaści admovicca ad vykarystańnia asabistaha transpartu. Dabracca da miescaŭ masavych hulańniaŭ možna budzie na hramadskim transparcie, sastavy jakoha buduć pavialičany.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?