Fota svaboda.org
Pavodle ŭdakładnienych źviestak, 14 vieraśnia ŭ Minsku byli zatrymany 18 udzielnikaŭ akcyi ŭ pamiać pra Ihara Pcičkina. Piaciora ź ich dastaŭleny ŭ Centr izalacyi pravaparušalnikaŭ (CIP).
Jak paviedamiŭ BiełaPAN Andrej Bandarenka — kiraŭnik pravaabarončaj ustanovy «Płatform inaviejšn», jakaja akazvaje pravavuju dapamohu svajakam Pcičkina, 13 udzielnikaŭ akcyi zatrymali kala śledčaha izalatara № 1 na vulicy Vaładarskaha, piaciarych (biez uliku žurnalistaŭ) — na vulicy Niamiha.
Pieršuju hrupu zatrymanych, u liku jakich byŭ Bandarenka, dastavili va UUS Maskoŭskaha rajona, druhuju — u Centralnaje RUUS. Pavodle infarmacyi Bandarenki, z Centralnaha RUUS u CIP dastaŭleny Alaksandr Haŭryš, Siarhiej Jaŭmienaŭ, Ihar Koval i Viktar Katlanik. Jašče adzin udzielnik akcyi, proźvišča jakoha pakul nieviadomaje, byŭ dastaŭleny ŭ CIP z Maskoŭskaha RUUS.
Sudy nad zatrymanymi, chutčej za ŭsio, projduć 16 vieraśnia. Na 16 vieraśnia ŭ sud Centralnaha rajona taksama vyklikana ciažarnaja Iryna Miranovič, siastra Pcičkina, jakaja była zatrymana i dastaŭlena ŭ Centralnaje RUUS, ale chutka adpuščana.
Što da tych udzielnikaŭ akcyi, jakija byli dastaŭleny ŭ Maskoŭskaje RUUS i zatym adpuščany, to im pozvy ŭ sud nie vydavali, paviedamiŭ Bandarenka. Tym nie mienš u dačynieńni da ŭsich składzieny administracyjnyja pratakoły za ŭdzieł u niesankcyjanavanaj akcyi.
