Dyrekcyja pa praviadzieńni čempijanatu śvietu pa chakiei 2014 hoda abaviazana zastrachavać mierapryjemstva ad strataŭ u vypadku admieny ci bajkotu.

Takaja miera ŭtrymlivajecca va ŭkazie prezidenta ad 13 vieraśnia № 430 ab uniasieńni dapaŭnieńniaŭ va ŭkaz ad 16 studzienia 2012 hoda № 28 «Ab niekatorych pytańniach praviadzieńnia čempijanatu śvietu pa chakiei 2014 hoda ŭ Minsku». «Dyrekcyja pa praviadzieńni čempijanatu śvietu pa chakiei z šajbaj 2014 hoda abaviazanaja zaklučyć sa strachavoj arhanizacyjaj — rezidentam Respubliki Biełaruś dahavor strachavańnia strataŭ (straty prybytku) dyrekcyi, Mižnarodnaj fiederacyi chakieja i (abo) kampanii Infront Sports & Media AG u vypadku admieny, bajkatavańnia ci pieranosu terminaŭ praviadzieńnia čempijanatu z-za fors-mažornych akaličnaściaŭ jak na svaju karyść, hetak i na karyść Mižnarodnaj fiederacyi chakieja i (abo) kampanii», — havorycca ŭ dakumiencie, tekst jakoha apublikavany na Nacyjanalnym pravavym partale Respubliki Biełaruś.

Minharvykankamu daručana zrabić «zachady, skiravanyja na vyklučeńnie nieabhruntavanaha rostu cen na pasłuhi hatelaŭ i pasłuhi arhanizacyjaj i indyvidualnych pradprymalnikaŭ, jakija zajmajucca hramadskim charčavańniem, u pieryjad praviadzieńnia čempijanatu».

Minharvykankam taksama pavinien zabiaśpiečyć arhanizacyju biaspłatnaha prajezdu ŭ hramadskim transparcie (aprača taksi) asob, akredytavanych dla ŭdziełu ŭ čempijanacie.

Aprača hetaha haradskim uładam daručana akazać padtrymku dyrekcyi čempijanatu «ŭ vyhladzie davańnia ŭ biazvypłatnaje karystańnie na čas praviadzieńnia čempijanatu ŭ pieryjad z 25 krasavika pa 31 maja 2014 hoda spartyŭnych zbudavańniaŭ, što znachodziacca ŭ apieratyŭnym upraŭleńni dziaržaŭnaj ustanovy «Šmatprofilny kulturna-spartyŭny kompleks „Minsk-Arena“, i spartyŭnych pabudoŭ kulturna-zabaŭlalnaha spartyŭnaha kompleksu, jaki budujecca ŭ žyłym rajonie Čyžoŭka ŭ Minsku, a taksama ŭ vyhladzie vyzvaleńnia dyrekcyi ad apłaty pasłuh, źviazanych z atrymańniem u karystańnie zhadanych spartyŭnych zbudavańniaŭ».

Ukaz vyzvalaje ad vypłaty PDK abaroty kampanii Infront Sports & Media AG, jakaja zajmajecca pryciahnieńniem aficyjnych partnioraŭ i rekłamaj u miežach čempijanatu śvietu pa chakiei.

Nahadajem, z zaklikami pieranieści ČS pa chakiei 2014 hoda ź Biełarusi ŭ inšuju krainu nieadnarazova vystupali zachodnija palityki, deputaty Jeŭraparłamienta i mižnarodnyja pravaabarončyja arhanizacyi ŭ suviazi z najaŭnaściu palitźniavolenych i pastajannymi parušeńniami pravoŭ čałavieka ŭ Biełarusi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?