Sulejman Kierymaŭ ciapier nie rady, što ŭviazaŭsia ŭ biznes, źviazany ź Biełaruśsiu.

Sulejman Kierymaŭ ciapier nie rady, što ŭviazaŭsia ŭ biznes, źviazany ź Biełaruśsiu.

Jon daručyŭ adpaviednym orhanam painfarmavać pra heta łondanskuju i maskoŭskuju biržy, na jakich kacirujucca akcyi rasijskaj kampanii.

«Jość infarmacyja pra toje, što ŭ ich u minusie 12 miljardaŭ dalaraŭ, a ŭ plusie ŭsiaho dva. Kali heta tak, to vychodzić, što i infarmacyja, jakuju jany pa ŭsim śviecie raspaŭsiudžvali, lipavaja. „Urałkalij“ — publičnaja kampanija, jakaja kacirujecca na łondanskaj i maskoŭskaj biržach. A raspaŭsiudžvańnie lipavaj spravazdačnaści i infarmacyi — heta ŭžo mižnarodnaje machlarstva», — skazaŭ Alaksandr Łukašenka ŭ čaćvier na naradzie.

«Ja daručyŭ adpaviednym orhanam źviazacca z łondanskaj i maskoŭskimi biržami, dzie adbyvajucca hetyja kaciroŭki, kab papiaredzić ich ab tym, što adbyvajecca na samaj spravie, kab my potym nie akazalisia krajnimi», — zajaviŭ Łukašenka.

Kanflikt z «Urałkalijem» raspačaŭsia sa sprečak pra padzieł kvot u miežach Biełaruskaj kalijnaj kampanii, jakaja była trejdaram jak biełaruskaha, tak i rasijskaha kaliju. Jana była stvorana dla padtrymańnia vysokich cen na rynku. Paśla razvału kampanii biełaruskija ŭłady pajšli na niekanviencyjny krok. Jany zavabili ŭ Biełaruś hiendyrektara «Urałkalija» Uładzisłava Baŭmhiertniera i aryštavali jaho. Jon praciahvaje znachodzicca ŭ źniavoleńni.

Abvinavačvańni «Urałkalija» ŭ ciažkaj finansavaj situacyi mohuć sarvać hiešefty ab prodažy jaho akcyj. Miarkujecca, što ŭ novaj situacyi svaje doli ŭ kampanii sprabavali pradać i Sulejman Kierymaŭ, jaki maje kantrolny pakiet akcyj, i šerah upłyvovych minarytarnych akcyjanieraŭ.

Biełaruś imkniecca paŭpłyvać na praces unutry «Urałkalija». Alaksandr Łukašenka zajaviŭ, što biełaruski bok nie vyklučaje mahčymaści adnaŭleńnia supracoŭnictva z «Urałkalijem» «u vypadku źmieny ŭłaśnika hetaj rasijskaj kampanii».

«Siońnia mahčymyja dva varyjanty. Pieršy — cyvilizavany razvod. My da hetaha hatovyja, sabralisia sychodzić — idzicie, ale nie pieraškadžajcie pracavać tut. My hatovyja pracavać sami saboj. Druhi varyjant — praciah supolnaj pracy. Źmieniacca haspadary, pryjduć ludzi, jakija zacikaŭleny ŭ vytvorčaści kalijnych uhnajeńniaŭ na pradpryjemstvie „Urałkalij“, my hatovyja ź imi pracavać», — zajaviŭ Alaksandr Łukašenka ŭ čaćvier na toj samaj naradzie.

Łukašenka ŭpeŭnieny, što «adno tolki adnaŭleńnie našych partniorskich suviaziaŭ abaviazkova padymie ceny na hety tavar u paŭtara-dva razy ciaham hetaha — pačatku nastupnaha hoda».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?