Prezident Irana Chasan Raŭchani zajaviŭ, što Chałakost jak złačynstva, jakoje ździejśnili nacysty, «varty asudžeńnia». Svajo mierkavańnie jon vykazaŭ u intervju amierykanskamu telekanału CNN padčas siesii Hienieralnaj asamblei AAN.
«Ja nie historyk… ale mahu skazać, što luboje złačynstva suprać čałaviečnaści, u tym liku toje, jakoje ździejśnili nacysty jak suprać jaŭrejaŭ, tak i suprać niejaŭrejaŭ, varta asudžeńnia», — zajaviŭ Raŭchani. Jon adkazvaŭ na pramoje pytańnie žurnalistki Kryścijan Amanpur, jakaja nahadała, što jaho papiarednik na pasadzie prezidenta Irana Machmud Achmadziniežad nieadnarazova zajaŭlaŭ, što Chałakost źjaŭlajecca mifam.
Adnačasova Raŭchani padkreśliŭ, što nie ličyć, što takoha rodu histaryčnyja padziei dajuć prava toj ci inšaj nacyi zachoplivać čužyja ziemli i vyciaśniać adtul ludziej.
Raniej Raŭchani vystupiŭ pierad udzielnikami Hienieralnaj asamblei AAN, zajaviŭšy, što nie imkniecca da abvastreńnia adnosin pamiž Iranam i inšymi krainami.
Jon adznačyŭ, što hatovy da nieadkładnych pieramovaŭ z nahody jadziernaj prahramy svajoj krainy, padkreśliŭšy, što jana nosić mirny charaktar. Akramia taho, Raŭchani zajaviŭ, što mižnarodnyja sankcyi suprać Irana zanadta žorstkija i što ad ich pakutujuć nie «palityčnyja elity», a «prostyja ludzi».
