Ilustracyjnaje fota, rg.ru.
Premjer-ministr Rasii Dźmitryj Miadźviedzieŭ zajaviŭ pra hatoŭnaść abmierkavać ź biełaruskim kaleham Michaiłam Miaśnikovičam temu «Urałkalija», paviedamlaje RIA Novosti.
«Usie abmiarkujem, viadoma», — skazaŭ Miadźviedzieŭ na bryfinhu 25 vieraśnia ŭ Astanie paśla pasiadžeńnia Vyšejšaha jeŭrazijskaha ekanamičnaha savieta.
Nahadajem, hramadzianin Rasii, hiendyrektar «Urałkalija», kiraŭnik naziralnaha savieta biełaruska-rasijskaha ZAT «Biełaruskaja kalijnaja kampanija» (BKK) Uładzisłaŭ Baŭmhiertnier byŭ aryštavany ŭ Minsku 26 žniŭnia i źmieščany ŭ śledčy izalatar KDB pavodle abvinavačańnia ŭ złoŭžyvańni ŭładaj i słužbovymi paŭnamoctvami.
16 vieraśnia namieśnik hienprakurora Rasii Alaksandr Źviahincaŭ paviedamiŭ, što Biełaruś pryniała rašeńnie vyłučyć materyjały ŭ dačynieńni da rasijskich hramadzian, jakija prachodziać pa hetaj kryminalnaj spravie, u asobnuju vytvorčaść i pieradać ich u Hienprakuraturu RF.
19 vieraśnia na naradzie pa najaŭnych ekanamičnych i źniešniepalityčnych pytańniach Alaksandr Łukašenka nie vyklučyŭ mahčymaści ekstradycyi Baŭmhiertniera ŭ Rasiju dla praviadzieńnia śledčych dziejańniaŭ.
20 vieraśnia pamočnik prezidenta Rasii Juryj Ušakoŭ zajaviŭ, što Kreml čakaje chutkaj vydačy Baŭmhiertniera, adnak hety praces «krychu zaciahvajecca».
«Učarašnija słovy prezidenta Biełarusi dazvalajuć spadziavacca, što hetaje pytańnie budzie najbližejšym časam vyrašana», — skazaŭ jon.
22 i 23 vieraśnia tema «Urałkalija» try razy abmiarkoŭvałasia ŭ Sočy prezidentami Biełarusi i Rasii, paviedamiŭ rasijski «Kommiersant'».
Adnak, pavodle źviestak vydańnia, Alaksandr Łukašenka i Uładzimir Pucin tak i nie zdoleli damovicca.
Zatrymka z vydačaj Baŭmhiertniera źviazana z patrabavańniem Minska praciahnuć jaho kryminalny pieraśled u Rasii, paviedamlajuć infarmavanyja krynicy.
24 vieraśnia Minsk naviedaŭ hienprakuror RF Juryj Čajka. Pavodle nieaficyjnaj infarmacyi, jaho vizit byŭ źviazany ź losam Baŭmhiertniera.
Tym časam Respublikanskaja kalehija advakataŭ paviedamiła: «Zaraz u intaresach padabaronnaha rychtujucca čarhovyja pracesualnyja dakumienty».
25 vieraśnia stała viadoma, što biełaruskija advakaty Baŭmhiertniera nastojvajuć na sustrečy z kiraŭnictvam Hienieralnaj prakuratury Biełarusi.
Sustreču z aryštavanym biźniesmienam taksama zapytała pasolstva RF u Biełarusi.
26 vieraśnia Biełaruś płanuje naviedać prezident RF Uładzimir Pucin. Razam z Alaksandram Łukašenkam jon budzie nazirać za biełaruska-rasijskimi sumiesnymi stratehičnymi vučeńniami «Zachad-2013», jakija pravodziacca adnačasova ŭ Biełarusi i Rasii.
Analityki nie vyklučajuć, što prezidenty čarhovym razam abmiarkujuć temu «Urałkalija».
