Sudom Minskaha rajona da 4,5 hoda pazbaŭleńnia voli z kanfiskacyjaj majomaści pryhavorany były hienieralny dyrektar UP «Minski miasakambinat», paviedamiła aficyjny pradstaŭnik Śledčaha kamiteta Biełarusi Julija Hančarova.
Były kiraŭnik taksama pazbaŭleny prava na praciahu piaci hadoŭ zajmać peŭnyja pasady i zajmacca peŭnaj dziejnaściu.
Prysud pakul nie nabyŭ moc.
Kryminalnaja sprava ŭ dačynieńni da byłoha hiendyrektara miasakambinata rasśledavałasia va ŭpraŭleńni Śledčaha kamiteta pa Minskaj vobłaści. Jon abvinavačvaŭsia va ŭčynieńni złačynstva, praduhledžanaha č. 2 art. 430 KK (atrymańnie chabaru ŭ bujnym pamiery).
Ustanoŭlena, što kiraŭnik, vykarystoŭvajučy svaje słužbovyja paŭnamoctvy, atrymaŭ chabar u 4.000 dalaraŭ ZŠA za davańnie pieršačarhovaha prava na atrymańnie płaty za vykananyja raboty adnamu z budaŭničych pradpryjemstvaŭ.
U jakaści śviedak pa spravie było dapytana bolš za 30 čałaviek. Nakładzieny aryšt na majomaść i hrašovyja srodki abvinavačanaha na ahulnuju sumu zvyš 5,7 miljarda rubloŭ.
Nahadajem, kryminalnaja sprava ŭ dačynieńni da Uładzimira Łazoŭskaha była raspačata ŭ kancy sakavika hetaha hoda Kastryčnickim RUUS Minska. U siaredzinie krasavika jamu było vystaŭlena abvinavačańnie ŭ atrymańni chabaru.
U kancy krasavika ŭpraŭleńniem Śledčaha kamiteta pa Minsku byli raspačaty kryminalnyja spravy ŭ dačynieńni da jašče dźviuch słužbovych asob UP «Minski miasakambinat» 1985 i 1990 hadoŭ naradžeńnia.
Było abjaŭlena, što jany padazrajucca ŭ padbuchtorvańni da davańnia chabaru, atrymańnia chabaru i davańnia chabaru ŭ bujnym pamiery. Kryminalnyja spravy raspačaty pavodle materyjałaŭ upraŭleńnia pa baraćbie z ekanamičnymi złačynstvami HUUS Minharvykankama.
Ustanoŭlena, što padazravanyja, źjaŭlajučysia słužbovymi asobami, u kampietencyju jakich uvachodziła vyrašeńnie pytańniaŭ, źviazanych z techničnym zabieśpiačeńniem vytvorčaj dziejnaści kambinata, doŭhi čas padbuchtorvali pradstaŭnikoŭ šerahu kamiercyjnych struktur da pieradačy im niezakonnaha ŭznaharodžańnia za spryjalnaje vyrašeńnie pytańniaŭ ab zaklučeńni dahavoraŭ na pastaŭki roznaj pradukcyi i rehularna atrymlivali hetyja finansavyja srodki.
Abodva padazravanyja byli zatrymany 23 krasavika ŭ momant pieradačy chabaru ŭ 2.900 dalaraŭ ZŠA. Pavodle papiarednich padlikaŭ, suma atrymanaha padazravanymi niezakonnaha ŭznaharodžańnia składaje prykładna 60 młn. rubloŭ. 26 krasavika ŭ dačynieńni da padazravanych była abrana miera strymańnia ŭ vyhladzie źmiaščeńnia pad vartu.