«Na błakitny dyvan nie nastupać», — papiaredžvaje Vanesa, publicist, što abaznačaje pryblizna śpiecyjalist pa suviaziach z hramadskaściu, pry CirqueduSoleil. U dzień pieršaha šoŭ, jakich u Minsku budzie piać, žurnalistaŭ zaprasili pahladzieć na toje, jak rychtujecca prahrama samaha zapatrabavanaha cyrku ŭ śviecie.
Na niedasiažnym dla starońnich błakitnym dyvanie z tuzin artystaŭ pravodzić raźminku, «Cyrk Sonca» šmatnacyjanalny, pobač raźminajucca dźvie dziaŭčyny-japonki, chłopiec u spartyŭnym kaściumie z nadpisam Russia, i artyst (jon ža trenier) Mark z Kanady.
Prahrama Alegria, jakuju cyrk pryvioz u Minsk, samaja staraja ŭ repiertuary — joj bolej za 20 hod.
Cirque du Soleil heta nie cyrk u kłasičnym razumieńni — z kłoŭnami, słanami i numarami, što iduć adzin za adnym. Kožnaje šoŭ — heta kanceptualnaja historyja z žyvoj muzykaj, i raźvitym siužetam.
Vyšejuzhadanaja Alegria raskazvaje pra kanflikt pakaleńniaŭ, jakija dzielać pamiž saboj uładu ŭ asobna ŭziataj krainie: heta pakaleńnie maładziejšaje, schilnaje da ŭsiaho novaha, i pakaleńnie stałaje, nastrojenaje kudy jak kansiervatyŭniej.
«U našaj trupie 55 artystaŭ i 45 čałaviek piersanała», — raskazvaje Vanesa. — Hetaje šoŭ my najčaściej vozim pa śviecie, prajechali bolš za 240 haradoŭ. Nas vielmi ciešyć, što ŭ Minsku raskuplenyja amal usie kvitki, kali šoŭ nam spadabajucca, mahčyma my pryjedziem da vas jašče».
Uvohule ŭ kamandzie Cirque du Soleil la sta čałaviek, amal pałova ź jakich adkazvaje za kaściumy, vopratku, hrym, achovu, čatyry kuchara, čatyry kaściumiera i hetak dalej. Pierasoŭvajecca cyrk na 22 furach, i navat dziŭna, jak usie rečy źmiaščajucca ŭ ich.
Pa zaviadzioncy, prynamsi vyhladaje tak, Vanesa znajomić žurnalistaŭ z artystam-biełarusam Słavaj, adnym z tych, što vystupajuć na brusach. Jahonaja rola — adna z «maładych ptušak».
«Moj siabar adnojčy parekamiendavaŭ mnie dasłać videa sa svaim vystupam u Cirque du Soleil, — kaža Słava. — Litaralna praź dzień mnie patelefanavali z Manreala, i zaprasili padpisać kantrakt».
Nasamreč, trapić u Cirque du Soleil možna nie tolki adpraviŭšy videa, menedžary sami padbirajuć budučych artystaŭ siarod cyrkačoŭ i spartoŭcaŭ. Časam apošnim davodzicca mianiać svaju śpiecyjalizacyju, ale ŭsie jany sychodziacca na dumcy, što Cirque du Soleil taho varty.
«Minsk-Arena» źmienšyłasia amal udvaja — scena zajmaje pałovu pamiaškańnia. My nazirajem za repietycyjaj himnastaŭ — śviatła amal niama, uspyškaj u fotaaparacie karystacca nielha, vypadkovaje śviatło moža trapić u voka artysta, jaki i tak zajmajecca rečami niebiaśpiečnymi — jašče zusim niadaŭna na vystupie ŭ Łas-Viehasie zahinuła adna z artystak cyrka.
«Paśla hetaha my stali bolej uvahi nadzialać ułasnaj biaśpiecy, — kaža Vanesa. — Bo my zvyklisia da štodzionnaj ryzyki i pierastali dumać pra jaje, a heta niebiaśpiečna».
Žurnalisty atačajuć kanadskaha treniera z pytańniami pra Minsk i draniki (kažuć, vyšejuzhadany Słava adnojčy nakarmiŭ imi ŭsiu hrupu).
Tak, horad artystam spadabaŭsia, choć jaho amal nie bačyli, vielmi čysta, šmat zielaniny na vulicach. Našmat lepiej, čym u šmatlikich haradach Rasii.
Dla šoŭ Alegria padrychtavana 700 kaściumaŭ, kožny ź jakich stvorany ŭručnuju.
Hihanckaja šafa ŭ harderobnaj (pad jakuju ŭ Minsk-Arenie adviali adzin z kalidoraŭ) padzielena na asobnyja siekcyi: «maładyja ptuški», «staryja ptuški», «nifmy» i hetak dalej. Kožny raz vopratka musić vyhladać jak novaja. Kanadcy sapraŭdnyja prafiesijanały — kaściumy pradumany da drobiaziaŭ, kožnaja maska zroblena ŭručnuju (uvohule, usio što tyčycca kaściumaŭ maje paznaku «chendmejd») i z tvaru taho ci inšaha akciora. Dla hetaha artysty zvyčajna jeduć u Manreal. Navat dla muzykaŭ padrychtavanyja piersanalnyja silikonavyja nasy-dziuby, u asobnych skrynkach.
La sceny prachodzić apošniaja techničnaja padrychtoŭka — supracoŭniki Areny pieramaŭlajucca: «Voś tyja dva šerahi treba adpravić u prodaž zaŭtra». Na siońniašniaje šoŭ kvitkoŭ užo niama.
