Na Ch Nacyjanalnym fiestyvali architektury «Minsk-2013» pradstaŭleny prajekt treciaj vietki minskaha mietro «Zialony łuh». Prynamsi tych stancyj, jakija zapłanavana pabudavać u najbližejšy čas.
«Naša Niva» prapanuje vam acanić dyzajn budučaj linii mietrapalitena.
Stancyju «Jubilejnaja płošča» płanujuć azdobić čyrvonymi tonami. Varta źviarnuć uvahu i na toje, što na treciaj linii ŭsie stancyi buduć mieć dźviery, praź jakija pasažyry traplajuć u vahon. Stvaryŭ prajekt Viačasłaŭ Łapato.
«Płošča Bahuševiča». Architektary Uładzimir Cielapnioŭ i Alaksandra Harkuša stvaryli dyzajn u śvietła-karyčnievym kolery, sama stancyja budzie adnosna nievialikaj.
Stancyja «Vakzalnaja» siarod inšaha budzie mieć haryzantalny eskałatar, jakija možna ŭbačyć u jeŭrapiejskim mietro. Takim čynam stancyja budzie złučana z «Płoščaj Lenina» Sprajektavali stancyju Uładzimir Cielapnioŭ, Volha Cielapniova i Alaksandr Jakubiec.
«Kavalskaja Słabada», kali daviarać rendaram, budzie stvorana na sutyknieńni stylaŭ — aproč sučasnaha, u jakim vykanany novyja stancyi kštałtu «Piatroŭščyny», jana budzie mieć kavanyja žyrandoli na stoli, a taksama hraviury z vyjavami kavaloŭ. Aŭtary prajekta — Ryhor Vasiljeŭ, Volha Cielapniova, Uładzimir Cielapnioŭ i Hanna Kuźmič.
«Aeradromnaja». Uładzimir Cielapnioŭ, Taćciana Žarabcova i Dyjana Nikicienka stvaryli stancyju zhodna z nazvaj, niekatoryja elemienty dyzajnu nahadvajuć častki samalotaŭ
«Niemaršanski sad». Prajekt Ryhora Vasiljeva i Aleny Majsievič budzie aformleny ścipła, ź vialikaj kolkaściu śvietła-zialonaha koleru.
«Słucki haściniec», sprajektavany Viačasłavam Łapato, taksama budzie ścipłym pa afarmleńni — dyzajn stancyi čymści nahadvaje «Piatroŭščynu».
20 vieraśnia horadabudaŭničy saviet zaćvierdziŭ prajekty stancyj. Pieršyja ź ich źjaviacca ŭ 2017 hodzie.