Jakoj maładyja architektary ŭjaŭlajuć Biełaruś? «Naša Niva» adabrała najbolš cikavyja, dziŭnyja i niezvyčajnyja prajekty — ad kasmałahičnaha parka ŭ Łahojsku da pramysłovaha hatela na minskim praśpiekcie Mašerava.
Cikavaja ideja pa rekanstrukcyi vulicy Kirava ŭ Navapołacku źjaviłasia ŭ architektara Vitala Daśko: zamiest typovaj savieckaj zabudovy, jon prapanuje stvaryć vulicu ź vialikaj kolkaściu škła i šmatpaviarchovikami vyhnutych, niby padtoplenych, formaŭ.
Inšy prajekt pa rekanstrukcyi častki Navapołacka prapanuje Arsień Kruhlik. Zabudova takoha typu taksama mocna adroźnivajecca ad savieckaj, pa kałarystycy nahadvaje Majak Minska, maje niekalki vysotak i chmaračos. Niezvyčajnuju prastakutnuju formu majuć haŭbcy na adnym z damoŭ.
Da taho ž, archtektar Vital Daśko prapanuje stvaryć u Navapołacku akvapark Water World futurystyčnych formaŭ, sa šklanym dacham, raznastajnaha płana prybudovami.
Alaksandra Damańkova prapanuje da niespaznavalnaści źmianić dom na minskaj vulicy Navavilenskaj.
Zamiest kłasičnaj «stalinki» paŭstanie čatyrochpaviarchovy madernisckaha typu dom ź vialikaj terasaj na apošnim paviersie.
Niezvyčajny prajekt rekanstrukcyi parka ŭ Łahojsku sprajektavali architektary A. Šakajła i M. Jurkievič. U parku musić paŭstać kasmałahičny budynak, jaki nahadvaje koły, što pierasiakajucca pamiž saboj.
Studenty BNTU prapanujuć pastavić na minskaj płoščy Bahuševiča vielizarny chmaračos, jaki na pravierku moža akazacca samym vysokim budynkam u horadzie.
Aŭtar nastupnaha prajekta nie byŭ ukazany na rendary, adnak z usich jon ledź nie samy cikavy. U pieršuju čarhu tym, što jon prapanuje pabudavać na rahu vulicy Čyrvonaj i praśpiekta Mašerava ŭ Minsku, dzie raniej było tralejbusnaje depo. Depo ŭžo daŭno «adsialili», adnak sprečki i zdahadki, što budzie pabudavana na jahonym mieście, dahetul cikaviać minčukoŭ.
Prapanavany prajekt — pramysłovy hatel, jaki naŭrad ci b upisaŭsia ŭ architekturu centra horada.
