Pracoŭny kalektyŭ «Urałkalija» źviarnuŭsia da Łukašenki z prośbaj pryniać miery dla «chutčejšaha vyzvaleńnia» hiendyrektara kampanii, piša charter97.org
Pra heta havorycca ŭ aficyjnym paviedamleńni kampanii. List, apublikavany na jaje sajcie, padpisali kala 6000 supracoŭnikaŭ «Urałkalija».
«My viedajem, što pryčyna dramatyčnaha raźvićcia padziej — supiarečnaści pamiž „Biełaruśkalijem“ i „Urałkalijem“ vakoł pastavak pradukcyi na zamiežnyja rynki.
My taksama razumiejem, što kamiercyjnyja sprečki mohuć prymać niečakany abarot, ale ŭ historyi partniorstva „Urałkalija“ i „Biełaruśkalija“ byli roznyja časy i roznyja składanyja situacyi — i nam zaŭsiody ŭdavałasia zachoŭvać ramki dyjałohu i razumieńnie bratniaha charaktaru našaha supracoŭnictva», — havorycca ŭ liście.
Supracoŭniki «Urałkalija» ličać, što toje, što adbyłosia stała sprobaj vyrašyć siłavymi mietadami ekanamičnuju sprečku dźviuch kampanij i ŭsie ŭźnikłyja ŭ suviazi z hetym roznahałośsi.
«Naš pracoŭny kalektyŭ uspryniaŭ situacyju z aryštam hiendyrektara, jak nieparazumieńnie, jakoje abaviazkova budzie vyrašana ŭ samyja karotkija terminy.
«My prosim Vas pryniać miery da chutčejšaha vyrašeńnia situacyi i vyzvaleńnia z-pad varty hienieralnaha dyrektara našaj kampanii Uładzisłava Baŭmhiertniera. My hłyboka pierakananyja, što Vaša dobraja vola nie dazvolić niespraviadlivaści pieramahčy nad zdarovym sensam», — pišuć supracoŭniki «Urałkalija».
Nahadajem, siońnia stała viadoma, što Baumhiertnier paśla miesiaca znachodžańnia ŭ SIZA KDB pieramieščany pad chatni aryšt. Jon znachodzicca ŭ trochpakajovaj kvatery pad nahladam čatyroch apieratyŭnikaŭ. Ź im u kvatery taksama znachodzicca maci, jakaja prybyła ŭ Minsk napiaredadni.
