Hiendyrektar AAT «Urałkalij» Uładzisłaŭ Baŭmhiertnier, jaki ŭ noč z 25 na 26 vieraśnia byŭ pieraviedzieny pad chatni aryšt, zabiaśpiečany ŭsim nieabchodnym i pačuvajecca dobra. Pra heta paviedamili 26 vieraśnia žurnalistam u Minsku jaho advakaty.
Nahadajem, ź SIZA KDB Baŭmhiertnier minułaj nočču byŭ pieraviedzieny pad damašni aryšt u arandavanuju trochpakajovuju kvateru.
«Usio, što treba, — usio ŭ jaho jość», — paviedamiŭ žurnalistam adzin z advakataŭ Dźmitryj Haračka. Pry hetym, adkazvajučy na pytańnie pra zdaroŭje Baŭmhiertniera, zaznačyŭ, što źniavoleńnie ŭ SIZA na stanie jaho zdaroŭja nie adbiłasia.
Advakat Darja Lipkina dadała, što Baŭmhiertnier «vyhladaje dobra, nastroj u jaho pazityŭny».
Kamientujučy źmienu miery strymańnia hiendyrektaru «Urałkalija», Haračka skazaŭ: «Źmianiali mieru strymańnia ŭ adpaviednaści z ustanoŭlenym paradkam. Jaho pravy nie parušalisia». Pry hetym jon dadaŭ, što «časavy faktar unios peŭnuju niečakanaść».
Pavodle słoŭ advakataŭ, jany nie viedajuć, ci sustrakaŭsia apošnimi dniami z Baŭmhiertnieram konsulski supracoŭnik pasolstva Rasii, jakoje try dni tamu nakiravała ŭ MZS Biełarusi zapyt pra takuju sustreču.
Advakat Hanna Słavina padkreśliła: «My pry takich sustrečach nie prysutničajem, tamu nie možam kamientavać».
Jana zaznačyła, što zaraz abarona čakaje rašeńnie pa svajoj zajavie ab pryjomie advakataŭ hienieralnym prakuroram Biełarusi ci jaho namieśnikam. Haračka dadaŭ, što jany taksama čakajuć razhladu skarhi na źmienu miery strymańnia, jakuju padali ŭ vyšejšuju instancyju paśla admovy zadavolić jaje Minskim haradskim sudom.
Adkazvajučy na pytańnie, ci mahčymaja ŭ najbližejšyja niekalki dzion ekstradycyja Baŭmhiertniera ŭ Rasiju, Lipkina skazała: «My pakul nie vałodajem infarmacyjaj pra jaho mahčymuju ekstradycyju».
Advakaty zaznačyli, što majuć pastajanny dopusk da svajho klijenta. Razam z Baŭmhiertnieram u arandavanaj kvatery zaraz znachodzicca jaho maci i supracoŭniki KDB, jakija achoŭvajuć jaho.
Na pytańnie, ci mohuć da Baŭmhiertniera pryjechać jaho žonka i dzieci, Haračka adkazaŭ, što blizkija svajaki mohuć pryjazdžać: «Zhody orhanaŭ kryminalnaha pieraśledu nie treba, tut dziejničaje paviedamlalny pryncyp».
