Na vulicy rezka pachaładała. Hetaja vosień moža stać adnoj z samych chałodnych za apošnija dziesiacihodździ.
Zvyčajna patreba ŭklučać aciapleńnie nadychodzić u Minsku 10–15 kastryčnika. A ciapier užo ŭ hety, apošni vieraśnioŭski tydzień, siaredniesutačnyja tempieratury stabilna apuścilisia nižej za 8 hradusaŭ. Usich cikavić, kali ž uklučać aciapleńnie.
Pavodle normaŭ, aciapleńnie ŭ kvaterach uklučajuć, kali siaredniesutkavaja tempieratura pavietra ciaham piaci dzion trymajecca na ŭzroŭni +8 hradusaŭ abo nižej.
Dla škoł, dziciačych sadkoŭ, miedycynskich dy inšych sacyjalnych ustanoŭ hety pakazčyk inšy: +10.
«Čakanyja piatyja sutki dla žycharoŭ kvater nastupiać u niadzielu. A kali brać sacyjalnyja abjekty, to siońnia idzie čaćviorty dzień ź siaredniesutkavaj tempieraturaj nižej za +10. I paciapleńnia vyšej hetaj adznaki nie čakajecca da 5 kastryčnika», — paviedamiła hałoŭny sinoptyk Respublikanskaha hidramietcentra Ludmiła Paraščuk.
Načalnik Upraŭleńnia haradskoj haspadarki i enierhietyki Minharvykankama Dźmitry Jančyk paviedamiŭ «Našaj Nivie», što «siońnia rychtujecca rašeńnie Minharvykankama, ale jano pavinna prajści ŭsie ŭzhadnieńni.
Kali siaredniesutačnaja tempieratura apuścicca nižej za normu, pačnucca ŭklučeńni aciapleńnia. Spačatku na abjektach pieršaj čarhi — sacyjalnych, zatym u kvaterach, a zatym na astatnich abjektach. Abjekty buduć padklučacca pa 20% u dzień, to bok ciaham piaci dzion paśla pačatku aciaplalnaha siezona ŭsie batarei paciaplejuć», — paviedamiŭ jon.
Jašče ŭ aŭtorak, kamientujucy ŭklučeńnie aciapleńnia ŭ Maskvie i adsutnaść jaho ŭ Minsku, Dźmitry Jančyk nahadvaŭ, što aciapleńnie ŭ Minsku pačynajecca ŭzvyčajna siaredzinie kastryčnika, i minčukam treba čakać ciopłyja radyjatary na Pakroŭ (14 kastryčnika).
