Misija Antykryzisnaha fondu JeŭrAzES (AKF) moža pryjechać u Biełaruś u kastryčniku. Dakładnaja data vizitu jašče nie vyznačana, adnak, chutčej za ŭsio, jon adbudziecca ŭ druhoj pałovie miesiaca.
Miarkujecca, što padčas vizitu misii buduć abmiarkoŭvacca vyniki biahučaj kredytnaj prahramy, jakaja dziejničaje pamiž Biełaruśsiu i AKF. Vosieńniu 2013 hoda biełaruskija ŭłady raźličvajuć atrymać ad fondu apošni (šosty) tranš kredytu ŭ pamiery 440 młn. dołaraŭ.
Pačatak dziejnaj kredytnaj prahramy Biełarusi z Antykryzisnym fondam JeŭrAzES byŭ pakładzieny dva hady tamu.
4 červienia 2011 hoda Saviet AKF uchvaliŭ vydzialeńnie Biełarusi finansavaha kredytu ŭ abjomie 3 młrd. dołaraŭ ZŠA. Kredyt vydzialajecca šaściu tranšami na praciahu 2011–2013 hadoŭ u adpaviednaści z vykanańniem etapaŭ kredytnaj prahramy biełaruskim uradam.
Piaty tranš kredytu Antykryzisnaha fondu JeŭrAzES Biełaruś atrymała 30 krasavika hetaha hoda.
U acency fondu ab vykanańni ŭmoŭ piataha tranša paviedamlałasia, što Biełaruś nie vykanała niekalkich indykatyŭnych pakazčykaŭ. U pryvatnaści, Biełaruśsiu nie byli vykanany indykatyŭnyja pakazčyki pa vieličyni pastupleńniaŭ ad pryvatyzacyi, pa ŭzroŭni kampiensavańnia nasielnictvam koštu pasłuh ŽKH i hramadskaha transpartu. Akramia hetaha, metavy ŭzrovień pa rostu patrabavańniaŭ bankaŭ da inšych siektaraŭ ekanomiki (indykatyŭny pakazčyk) pa vynikach 2012 hoda ŭdvaja pieravysiŭ zapłanavany ŭzrovień.
U 2013 hodzie paśla pieramoŭ pamiž biełaruskimi ŭładami i pradstaŭnikami AKF pakazčyk pa rostu kredytavańnia ekanomiki byŭ pieraviedzieny ŭ razrad kantrolnych i ŭstanoŭleny na ŭzroŭni 1,5% u miesiac. Na dumku pradstaŭnikoŭ fondu, abmiežavańnie tempaŭ kredytavańnia sadziejničaje strymlivańniu inflacyjnych pracesaŭ.
Tym nie mienš, jak paviedamlaŭ raniej Antykryzisny fond JeŭrAzES, tempy kredytavańnia biełaruskaj ekanomiki sioleta apiaredžvali praduhledžanyja tempy. Pradstaŭniki AKF raniej adznačali, što nievykanańnie Biełaruśsiu hetaha kantrolnaha pakazčyku moža ŭskładnić vydzialeńnie šostaha tranša kredytu.
Da hetaha času Minfin Biełarusi vykazaŭ žadańnie padrychtavać novuju kredytnuju prahramu z Antykryzisnym fondam JeŭrAzES. U svaju čarhu namieśnik staršyni praŭleńnia Jeŭrazijskaha banka raźvićcia, jaki kiruje srodkami AKF, Siarhiej Šatałaŭ zajaviŭ u kancy žniŭnia, što havaryć pra novuju kredytnuju prahramu ź Biełaruśsiu dačasna.
«Nieabchodna spačatku praanalizavać vyniki dziejnaj stabilizacyjnaj prahramy, jakaja pačałasia ŭ 2011 hodzie i pakul nie zavieršana», — skazaŭ Šatałaŭ.
Treba adznačyć, što ŭ kastryčniku 2013 hoda ŭ Minsk płanuje prybyć i misija Mižnarodnaha valutnaha fondu, ź jakim biełaruskija ŭłady taksama chacieli b damovicca ab novaj kredytnaj prahramie.
