Prezientacyja «BiełAZ 75710» u Žodzinie. Prezientacyja «BiełAZ 75710» u Žodzinie. Fota «Žodzinskija naviny».
Prezientacyja «BiełAZ 75710» u Žodzinie. Fota «Žodzinskija naviny».
25 vieraśnia kancern BiełAZ prezientavaŭ svoj novy karjerny samazvał 75710 hruzapadjomnaściu 450 ton. Na dadzieny momant heta samy vialiki samazvał u śviecie — na zavodzie ŭžo rychtujuć zajavu dla «Knihi rekordaŭ Hinesa».
Sam «BiełAZ 75710» važyć 360 ton. U vyniku vaha zahružanaj mašyny składaje bolš za 800 ton.
Kab raźmierkavać takuju vahu, novy samazvał maje ažno vosiem hihanckich kołaŭ: pa čatyry sparanyja kołavyja pary. Pry hetym usie jany pavarotnyja, što robić 20-mietrovy aŭtamabil vielmi manieŭranym.
Dva dyzielnyja ruchaviki raźvivajuć mahutnaść u 4600 konskich siłaŭ i mohuć razahnać samazvał da 64 km/h.
U samazvale ŭsio nadzvyčaj vialikich pamieraŭ. Tolki dva paliŭnyja baki mohuć źmiaščać pa 2800 litraŭ kožny, hieamietryčny abjom kuzava (kali nahružać rudu biez «horki») składaje 160 kubamietraŭ, a dyjamietr kožnaj z vaśmi šyn Michelin- 4 mietry.
Na aŭtamabil ustalavanyja i admysłovyja sistemy: pažaratušeńnia, apaviaščeńnia pra blizkaść da vysakavoltnych linijaŭ i videanazirańnia.
Da źjaŭleńnia madeli 75710 samym vialikim samazvałam na płaniecie byŭ Liebherr-T282B, zdolny pieravieźci 363 tony. U liniejcy BiełAZ taksama jość 360 i 320-tonnyja mašyny.
