«Hieroja» našumiełaha «žyvoha ščyta» 5-hadovaj daŭniny Ramana Mienciuka znoŭ złavili za pjanku, tolki jon ciapier u DAI nie idzie, chavajecca», — paviedamiŭ na haračuju liniju Tut.by karystalnik Ihar z Maładziečna.
«7 vieraśnia kala 4 hadzin nočy ŭ Maładziečna inśpiektary DPS DAI Minskaj vobłaści spynili Mitsubishi, jakim kiravaŭ 33-hadovy miascovy žychar.
Vadzicielskaha paśviedčańnia pry im nie było, źniešni vyhlad i pavodziny mužčyny prymusili inśpiektaraŭ vykazać zdahadku, što kiroŭca niećviarozy.
U vyniku vyjaviłasia, što ŭtrymańnie ałkaholu ŭ jaho kryvi skłała 1,51 pramile, — paviedamiŭ Auto.tut.by pres-sakratar UUS Minabłvykankama Alaksandr Danilčanka.
„Tak, zatrymany kiroŭca — heta Raman Mianciuk“, — paćvierdziŭ pradstaŭnik abłasnoj milicyi.
2 sakavika 2008 Raman Mianciuk i jahonaja siabroŭka Volha jechali na aŭtamabili baćki Volhi VW Golf.
Nie majučy prava kiravańnia, pjany Mianciuk (1,31 pramile) sieŭ za rul, pieravysiŭ chutkaść i nie padparadkavaŭsia zahadu supracoŭnika DPS Słuckaha rajona ab spynieńni, padadzienym u nasielenym punkcie Haradzišča, što ŭ 15 km ad Słucka.
Narad DAI pačaŭ pieraśledavańnie, pieradaŭšy kaleham paviedamleńnie pra kiroŭcu-ŭciekača.
Na ŭjeździe ŭ Minsk supracoŭniki DAI Kastryčnickaha rajona stalicy vystavili na ich šlachu „žyvy ščyt“: jany zahadali kiroŭcam aŭtamabilaŭ Toyota Rav4, Honda Accord i BMW 525 ź ludźmi (samamu małodšamu pasažyru było 3 hady) spynić aŭtamabili ŭ pałosach ruchu, nie źjazdžajučy na ŭbočynu, a praz karotki čas u ich na vialikaj chutkaści ŭrezaŭsia VW Golf, za rulom jakoha siadzieŭ Mianciuk.
Za hetyja dziejańni supracoŭniki DAI byli pryznanyja vinavatymi pa č. 1 art. 426 KK (pieravyšeńnie ŭłady abo słužbovych paŭnamoctvaŭ) i prysudžanyja da 2 hadoŭ pazbaŭleńnia voli ŭmoŭna z adterminoŭkaj na 3 hady biez prava zajmać peŭnyja pasady na praciahu troch hadoŭ.
Sam Mianciuk byŭ 28 kastryčnika taho ž hoda asudžany na 5 hadoŭ pazbaŭleńnia voli z adbyvańniem pakarańnia ŭ kałonii ahulnaha režymu i pazbaŭleńniem prava kiravańnia transpartnymi srodkami na piać hadoŭ.
U vieraśni 2012 hoda jon vyzvaliŭsia pa amnistyi, z hetaha momantu i staŭ adličacca 5-hadovy termin pazbaŭleńnia pravoŭ.
