Žurnalisty biełaruskich niezaležnych ŚMI źbirajuć podpisy pad Adkrytym listom u padtrymku aryštavanaha na dva miesiacy rasijskaha fatohrafa Dzianisa Siniakova.
Dzianisa zatrymali 19 vieraśnia paśla aśviatleńnia akcyi aktyvistaŭ «Hrynpis» u Murmanskaj vobłaści Rasii na naftazdabyŭčaj płatformie «Hazproma».
18 vieraśnia aktyvisty «Hrynpis» pasprabavali padniacca na naftavuju płatformu «Pryrazłomnaja» kampanii «Hazprom nafta šelf» u Piačorskim mory. Jany płanavali vystupić suprać naftazdabyčy ŭ Arktycy. Śledčy kamitet Rasii abvinavaciŭ aktyvistaŭ u piractvie i raspačaŭ kryminalnuju spravu. U kamandzie ekołahaŭ było 30 čałaviek z 19 krain. Bolšaść ź ich aryštavanyja na dva miesiacy i znachodziacca zaraz u SIZA Murmanskaj vobłaści. Na dva miesiacy aryštavany i Dzianis Siniakoŭ.
Biełaruskija žurnalisty vykazvajuć salidarnaść sa svaim rasijskim kaleham.
«My, biełaruskija žurnalisty, vielmi zaniepakojenyja aryštam rasijskaha kalehi, fatohrafa Dzianisa Siniakova.
My ličym surjoznaj pahrozaj svabodzie słova situacyju, kali fatohrafa zatrymlivajuć razam z udzielnikami akcyj, pazbaŭlajuć aparatury i padviarhajuć aryštu za toje, što jon vykonvaje svaju pracu.
Fiksujučy padziei, fatohraf nie niasie adkaznaści za ich, navat kali toje, što adbyvajecca nie padabajecca ŭładam», — havorycca ŭ liście — Patrabujem nieadkładnaha vyzvaleńnia našaha kalehi i źniaćcia ź jaho ŭsich abvinavačvańniaŭ»,
Siabry BAŽ prapanujuć: kali Vy — biełaruski žurnalist i zhodnyja sa źmiestam lista, nakirujcie na je-mail [email protected] Vaša imia, proźvišča, ŚMI (kali jość), ź jakimi supracoŭničajecie i pasadu ŭ hetym ŚMI. Takim čynam Vy addaścio svoj hołas u padtrymku rasijskaha kalehi, i Vaša imia źjavicca pad tekstam «Adkrytaha lista». List budzie nakiravany rasijskim uładam.
Siarod tych, chto padpisaŭ list, kiraŭnik Biełaruskaj asacyjacyi žurnalistaŭ Žanna Litvina, redaktar sajta baj.by Volha Babak, pres-sakratar BAŽ Barys Harecki, hałoŭny redaktar štotydniovika «Biełorusy i rynok» Viačasłaŭ Chadasoŭski, žurnalisty Julija Daraškievič, Alaksandr Barazienka, Juraś Karmanaŭ, Alaksandr Starykievič dy inš.
Darečy, siońnia šerah rasijskich elektronnych ŚMI (napr. lenta.ru, «Dožd́», «NTV», «Echo Moskvy», «Russkij rieportier», «Bolšoj horod», The New Times dy inš.) u znak pratestu suprać źniavoleńnia Dzianisa Siniakova źmiaščaje čornyja akiency zamiest fatahrafij.
A Sierž Tankian na kancercie ŭ Maskvie pryśviaciŭ siońnia pieśniu zatrymanym, zaklikaŭšy rasijski ŭrad źviarnuć uvahu na «Hazprom» i jaho spravy.
