ZŠA abhaniaje Rasiju jak najbujniejšy ŭ śviecie vytvorca nafty i pryrodnaha hazu, piša hazieta The Wall Street Journal.
Pavodle źviestak EIA i Mižnarodnaha enierhietyčnaha ahienctva, u lipieni ZŠA vyrabili nafty i hazu ŭ abjomie, anałahičnym 22 miljonam barelaŭ nafty za dzień. Pa papiarednich prahnozach, vypracoŭka nafty ŭ Rasii skłała kala 21,8 młn barelaŭ u dzień.
Pakul jašče Rasija zdabyvaje bolš nafty j hazu ź nietraŭ, ale ŭ «ahulnym zaliku» pieramahli amierykancy, bo jany vyrablajuć taksama šmat bijapaliva.
Heta moža pryvieści da surjoznych źmienaŭ na rynku enierhanobitaŭ. «Heta vydatny pavarot padziej. Heta novaja era rynkavych umoŭ i mahčymaściaŭ, ab jakich my i nie maryli», — prakamientavaŭ Adam Siaminski, kiraŭnik Upraŭleńnia enierhietyčnaj infarmacyi ZŠA.
U svaju čarhu, rasijskija navukoŭcy nie padzialajuć aptymizm amierykancaŭ. «Rasieja vyhladaje hałoŭnym niaŭdačnikam na suśvietnym rynku», - ličyć Taćciana Mitrova ź Instytuta enierhietyčnych daśledavańniaŭ RAN. Jana adznačyła, što bolš za 40% biudžetu Rasiei pastupaje ad prodažu nafty, hazu i źviazanych ź imi pošlin i padatkaŭ.
Instytut prahnazuje, što rasiejski ekspart nafty moža ŭpaści ad 25% da 30% paśla 2015 hoda, što pryviadzie da skaračeńnia VUP bolš čym na $100 miljardaŭ.
Biełaruś atrymlivaje amal 100% enierhanośbitaŭ z Rasii pa dempinhavych cenach. Heta płata Rasii za palityčny kantrol nad Minskam. Pryviazka Biełarusi da rasijskich krynic enierhii i rasijskaha rynku aznačaje, što budučynia biełaruskaha dabrabytu całkam zaležyć ad budučyni rasijskaj ekanomiki.
