Alaksandr Łukašenka abjaviŭ vymovu namieśniku premjer-ministra Anatolu Kalininu i byłomu ministru kultury, pasłu Biełarusi ŭ Francyi Paŭłu Łatušku.
Jon abvinavaciŭ čynoŭnikaŭ u «niepryniaćci naležnych mier pa vykanańni daručeńniaŭ kiraŭnika dziaržavy ab rekanstrukcyi i restaŭracyi budynka Nacyjanalnaha akademičnaha teatra imia Janki Kupały, što paciahnuła pavieličeńnie terminaŭ uvodu abjekta ŭ ekspłuatacyju i parušeńni ŭ vykarystańni biudžetnych srodkaŭ».
Z hetaj nahody čytač «NN» zadajecca pytańniem,
ci moža Łukašenka rabić vymovy lubym čynoŭnikam? Pavodle pracoŭnaha kodeksu, vymovu moža abjavić najmalnik. A Kalinin i Łatuška — zusim nie supracoŭniki administracyi prezidenta...
Z pytańniem my źviarnulisia da advakata Maksima Znaka, jaki rastłumačyŭ asablivaści adkaznaści dziaržaŭnych słužačych u Biełarusi.
«U dadzienym vypadku i Kalinin, i Łatuška źjaŭlajucca dziaržaŭnymi słužačymi. U adpaviednaści z zakonam «Ab dziaržaŭnaj słužbie ŭ Respublicy Biełaruś» najmalnikami niekatorych dziaržaŭnych słužačych źjaŭlajucca dziaržaŭnyja ŭstanovy, jakija padpisyvajuć pracoŭny kantrakt.
Adnak u šyrokim sensie najmalnikam kožnaha dziaržsłužačaha źjaŭlajecca sama dziaržava. Padpisvać pracoŭny kantrakt ad imia dziaržavy budzie taja asoba, jakaja budzie mieć adpaviednyja paŭnamoctvy.
Zhodna z p.7 artykuła 17 zakona «Ab prezidencie Respubliki Biełaruś», prezident praznačaje namieśnikaŭ premjer-ministra, ministraŭ, a taksama prymaje rašeńnie ab ich adstaŭcy. Anałahičnyja paŭnamoctvy praduhledžany ŭ adnosinach da pasłoŭ. Zhodna z Pracoŭnym kodeksam (art. 201), dyscyplinarnaje spahnańnie prymajecca tym orhanam, jakomu nadadzieny pravy pryjomu i zvalnieńnia rabotnikaŭ, albo pa jaho daručeńni – inšym orhanam. Takim čynam,
niama sumnievaŭ u tym, što paŭnamoctvy pa pryciahnieńni da adkaznaści u prezidenta jość.
Adnačasova treba mieć na ŭvazie, što adkaznaść dziaržaŭnych słužačych maje svaju śpiecyfiku: naprykład, dla ich praduhledžany takija svojeasablivyja spahnańni jak «papiaredžańnie ab niapoŭnaj pracoŭnaj adpaviednaści», «panižeńnie ŭ kłasie dziaržaŭnaha słužača na termin da 6 miesiacaŭ» i hetak dalej. Ale pry hetym pavinny vykonvacca ahulnyja praviły pryciahnieńnia da dyscyplinarnaj adkaznaści: zapatrabavańnie u rabotnika tłumačeńnia, piśmovy zahad, adznaka rabotnika ab aznajamleńni i h.d.
Ahulnyja praviły datyčacca taksama i terminu pryciahnieńnia da pracoŭnaj adkaznaści: nie bolš za 6 miesiacaŭ z času ździejśnieńnia parušeńnia, i nie bolš za 1 miesiac z času, jak pra heta stała viadoma. Pry hetym u miežach zvyčajnych pracoŭnych adnosin nielha abjavić vymovu rabotniku, jaki zvolnieny z toj pasady, na jakoj było parušanaja dyscyplina.
Adnak u adnosinach ź dziaržaŭnymi słužačami jość cikavy miechanizm «piersanalnaj adkaznaści» – jakaja zvyčajna ustaloŭvajecca zakanadaŭčym aktam, datyčycca kankretnaj śfiery ci prajekta, i, peŭna, zastajecca, niahledziačy na źmienu miesca pracy.
Hałoŭnaje, što treba adznačyć, heta charaktar spahnańnia.
Vymova, vyniesiennaja na takim uzroŭni, maje, pierš za ŭsio, nie jurydyčny, a publičny charaktar.
Sacyjalnaja adkaznaść u takim vypadku nastupaje navat tady, kali byli parušeńni jurydyčnaj pracedury, a status dziaržaŭnaha słužačaha dazvalaje pry nieabchodnaści vyzvalić jaho ad zajmanaj pasady biez najaŭnaści papiarednich vymoŭ ci zaŭvah», – raskazaŭ Maksim Znak.
